हिंगोली : दिवाळी उत्सव साजरा झाला असून दिवाळीच्या सुट्या व भाऊबीजनिमित्ताने अनेकजण घरी जात असतात. यामुळे घरे बंद आहेत. याचाच फायदा चोरट्यानी घेतला असून हिंगोली जिल्ह्यात दिवाळी सणात चोरट्यांनी धुमाकूळ घातला आहे. भाऊबीजच्या रात्रीच बंद घरे व दुकाने फोडून चोरट्यानी दागिन्यांसह रोख रक्कम लंपास केली आहे.  

दिवाळीच्या सुटीनिमित्ताने बाहेरगावी किंवा दिवाळी अनेकजण घरी जात असतात. तर भाऊबीजेला सासुरवासिनी महिला माहेरी जात असतात. यामुळे घर बंद असतात. याचा फायदा चोरटे घेत असतात. असाच प्रकार (Hingoli) हिंगोलीच्या सेनगाव तालुक्यातील आजेगावमध्ये घडला आहे. भाऊबीजेच्या मध्यरात्री चोरट्यांनी २ किराणा दुकानासह चार बंद घराचे कुलूप तोडून चोरी केली आहे. चोरटयांनी रोख रक्कम व सोने- चांदीचे दागिने लंपास केले आहेत. रात्रीच्या वेळी चोरी करताना हे चोरटे सीसीटीव्ही कॅमेऱ्यात कैद झाले आहेत. 

कष्टाची कमाई गेल्याने महिलेने फोडला हंबरडा 

दरम्यान गावात झालेल्या चोरीच्या घटनेबाबत पोलिसांना (Police) माहिती देण्यात आली होती. गोरेगाव पोलिसांसह स्थानिक गुन्हे शाखेच्या पथकाकडून या चोरट्याचा शोध घेणे सुरू आहे. दरम्यान काबाडकष्ट करून कमावलेल्या पैशातून मिळवलेले लाखो रुपयांचे दागिने चोरी गेल्याने आजेगावमधील एका महिलेने पोलिसांच्या पुढेच हंबरडा फोडला होता.