हिंगोली : हिंगोली जिल्ह्यातील कळमनुरी तालुक्यात येत असलेल्या मसाई वारंगा गावात आज सकाळी एका शेतकऱ्याच्या खुनाची घटना घडल्याने खळबळ उडाली आहे. रात्रीच्या सुमारास शेतात झोपले असताना अज्ञाताने हल्ला करत खून केला आहे. या घटनेचा तपास पोलिसांकडून सुरु करण्यात आला आहे. 

मसाई वारंगा या गावातील साहेबराव गिराम (वय ५५) असे खून झालेल्या शेतकऱ्याचे नाव असल्याची माहिती पोलिसांनी दिली आहे. (Hingoli) साहेबराव गिराम यांची वारंगा मसाई गावापासून हाकेच्या अंतरावर सहा एकर शेती आहे. सद्या त्यांच्या शेतात कापूस वेचणीचे काम सुरू असल्याने गिराम दररोज शेतात कापूस राखणीसाठी जातात. (Crime News) त्यानुसार काल रात्री देखील कुटुंबीयांसोबत रात्रीचे जेवण आटोपून गिराम हे शेतात कापूस राखण्यासाठी गेले होते. मात्र सकाळी लवकर घरी येणारे वडील का आले नाहीत? याचा शोध घेण्यासाठी गिराम यांचा मुलगा शेतात पोहोचला.  

रक्ताच्या थारोळ्यात मृतदेह पाहून मुलगा हादरला 

त्यावेळी साहेबराव यांचा मृतदेह रक्ताच्या थारोळ्यात आढळल्याचं त्यांच्या मुलाला निदर्शनास आले. या घटनेची माहिती गावात समजताच गावकऱ्यांनी शेतात धाव घेतली. तसेच कळमनुरी पोलिस देखील तातडीने घटनास्थळी दाखल झाले. पोलिसांनी पंचनामा करत साहेबराव यांचा मृतदेह रुग्णालयात शवविच्छेदनासाठी दाखल केला आहे. या घटनेचा कळमनुरी पोलीस शोध घेत असून साहेबराव यांचा इतक्या निर्घृण पणे खून कोणी व का केला याची कारणे पोलीस तपासत आहेत.