हिंगोली : हिंगोली जिल्हा गोळीबाराच्या घटनेने हादरला आहे. रात्रीच्या सुमारास जुन्या वादातून एका व्यक्तीने तिघांवर बेधुंद गोळीबार केल्याची घटना हिंगोली तालुक्यातील भांडेगावमध्ये घडली आहे. या घटनेत वीस वर्षाचा तरुणाचा जागीच मृत्यू झाला आहे. तर अन्य दोघे जण गंभीर जखमी झाले आहेत. गोळीबार झाल्याच्या घटनेने खळबळ उडाली असून जखमींना लागलीच रुग्णालयात दाखल करण्यात आले आहे. 

हिंगोली तालुक्यातील भांडेगाव येथे रात्रीच्या सुमारास जुन्या वादातून सदरची घटना घडली आहे. दरम्यान या घटनेत शिवराज कुंडलिक जगताप (वय २०) असे गोळीबाराच्या घटनेत ठार झालेल्या तरुणाचे नाव आहे. शिवराज व गोळीबार करणारा आरोपी यांच्यात काही दिवसांपासून वाद आहे. या वादाच्या रागातून संबंधिताने शिवराज व त्यांच्यासोबत असलेल्या दोघांवर बेधूंद गोळीबार करण्यात आला. बेसावध असलेल्या शिवराज याला गोळी लागल्याने त्याचा जागीच मृत्यू झाला.   

भांडण सोडण्यासाठी गेलेल्या व्यक्तीवरही गोळीबार 

धक्कादायक बाब म्हणजे भांडण सोडवण्यासाठी गेलेल्या सुभाष कुरवाडे नावाच्या व्यक्तीवर देखील संबंधिताने दोन गोळ्या झाडण्यात आल्या. यात त्यांच्या मानेला गंभीर दुखापत झाली आहे. गोळीबाराच्या या घटनेनंतर हिंगोलीच्या शासकीय रुग्णालयात मृत्यू झालेल्या तरुणाच्या नातेवाईकांनी टाहो फोडला होता. तर दोन्ही जखमींवर सध्या रुग्णालयात उपचार सुरु आहेत. 

गोळीबार करणारा ताब्यात 

दरम्यान घटनेची माहिती मिळताच हिंगोली पोलिसांनी घटनास्थळी जात तपासाला सुरवात केली. यानंतर गोळीबार करणाऱ्या व्यक्तीला तातडीने ताब्यात घेत त्याच्या जवळील पिस्तुल जप्त केल्याची माहिती दिली आहे. तर घटनेचा अधिक तपास सुरु असून नेमके कोणत्या कारणातून गोळीबार करण्यात आला आहे. याचा तपास पोलिसांकडून करण्यात येत आहे.