- संजय राठोड

Yavatmal News: यवतमाळ जिल्ह्यात आज पासून संपूर्ण जिल्ह्यात हेल्मेट (helmet) सक्ती लागू करण्यात आली आहे. विना हेल्मेट दुचाकी चालविणा-या सुमारे २९० नागरिकांवर उप प्रादेशिक परिवहन विभागाने कारवाई केली आहे. त्यामुळे वाहन चालकांना हेल्मेट परिधान करुनच वाहन चालवावे लागणार असल्याचे चित्र सध्या यवतमाळ जिल्ह्यात आहे.

यवतमाळ जिल्ह्यात २०२२ या वर्षात ६६२ वाहनांचे अपघात घडले. यात मृत्यूमुखी ४२६ तर ५८६ गंभीररित्या जखमी झाले. जखमीपैकी अनेकांना कायमचे अपंगत्व आले आहे. अपघात झाल्यानंतर तसेच त्यामध्ये कुटुंबातील व्यक्तीचा जीव गमावल्यामुळे सर्व कुटुंबावर प्रचंड आर्थिक व मानसिक आघात होतो. त्यांची हानी होते. ती कधीच भरुन निघणारी नसते.

वाहन अपघातात मृत्यू होणाऱ्यांची संख्या लक्षात घेता ७० टक्के अपघातामध्ये दुचाकी चालकांचा मृत्यू डोक्यावर हेल्मेट न वापरल्यामुळे झाल्याचे निष्पन्न झाले आहेत. त्यामुळे नागरिकांच्या सुरक्षिततेसाठी आजपासून जिल्ह्यात हेल्मेट सक्ती लागू केल्याची माहिती उप प्रादेशिक परिवहन विभागाचे अधिकारी ज्ञानेश्वर हिरडे यांनी साम टीव्हीला दिली.

दरम्यान आज पहाटेपासून यवतमाळ जिल्ह्यात हेल्मेट परिधान करुन वाहन चालविण्याच्या आदेशाचे काटेकाेर अंमलबजावणीस प्रारंभ झाला आहे. पहाटेपासून २९० वाहनधारकांवर आदेशाचे उल्लंघन केल्याने (rto) कारवाई करण्यात आली आहे.

त्यातून दोन लाख रूपयांचा दंड वसूल करण्यात आला आहे. उप प्रादेशिक परिवहन विभागाचे निरिक्षक संदीप मुखे यांनी नागरिकांनी हेल्मेट परिधान करुन वाहन चालवावे असे आवाहन केले आहे. (Maharashtra News)

Edited By : Siddharth Latkar