सातारा : जून महिन्यात पाठ फिरवणाऱ्या पावसाने (Rain) जुलै महिन्यात चांगलीच धांदल उडवली आहे. राज्यातील विविध भागात सतत तीन दिवसांपासून मुसळधार पाऊस कोसळत आहे. मुसळधार पावसाने जनजीवन विस्कळीत झालं असून काही ठिकाणी वाहतूक देखील ठप्प झाली आहे. सातारा (Satara) जिल्ह्यात सोमवारी रात्रीपासून मुसळधार पाऊस पडत आहे. या पावसामुळे नदी नाल्यांना पूर आलाय. अशातच किल्ले प्रतापगडाकडे जाणाऱ्या रस्त्यावर दरड कोसळली असल्याची माहिती आहे. (Satara Rain Updates)

जिल्ह्यात तीन दिवसांपासून सुरू असलेल्या मुसळधार पावसाने बहुतांश पूल पाण्याखाली गेले आहे. महाबळेश्वर तालुका, पाटण तालुक्यात तर पावसाच्या जोरदार सरी कोसळत आहे. दरम्यान, किल्ले प्रतापगडकडे जाणाऱ्या रस्त्यावर दरड कोसळल्याची माहिती आहे. दरड कोसळल्यामुळे किल्ल्याकडे जाणारी वाहतूक ठप्प झाल्याची माहिती आहे. रात्री उशिरा दरड कोसळली असल्यामुळे अद्याप प्रशासनाकडून कोणी पोहचू शकले नाही. (Satara Rain News)

सातारा जिल्ह्यात गेल्या 24 तासात मोठ्या प्रमाणात पावसाची नोंद झाली आहे. कोयना धरण क्षेत्रात कालपासून पावाची संततधार सुरू आहे. त्यामुळे धरणात येणारे पाणी वाढण्यास सुरवात झाली आहे. गेल्या 24 तासात धरणातील पाणी साठ्यामध्ये जवळपास 2 टीएमसीने वाढ झाली आहे. त्यामुळे कोयना धरणातील पाणीसाठा 17.83 टीएमसीवर पोहचला आहे.

Edited By - Satish Daud