गोकुळ दूध संघ…कोल्हापूरच्या ग्रामीण अर्थव्यवस्थेचा कणा… हजारो शेतकऱ्यांचा विश्वास… पण पहिल्यांदाच या संस्थेवर प्रशासक बसवला गेला आणि सहकार क्षेत्रात खळबळ उडाली. तब्बल 65 वर्षांत कधीही न घडलेल्या घटनेनं कोल्हापूरच्या राजकारणात अक्षरश: भूकंप झालाय..

कोल्हापूरच्या गोकुळात प्रशासकराज !

गोकुळ दूध संघाच्या इतिहासात पहिल्यांदाच प्रशासकाची नेमणूक करण्यात आलीय..मुदत संपल्यानं संचालक मंडळ बरखास्त करून, 'प्राधिकृत अधिकारी मंडळ' गोकुळ दूध संघ चालवणार आहे...त्यामुळे हसन मुश्रीफांना मोठा धक्का बसल्याची चर्चा असून भाजप समर्थक गटाची सरशी झाल्याची चर्चा आहे. जिल्हा उपनिबंधक संजयकुमार सुद्रिक 'गोकुळ'चे नवे प्रशासकीय अध्यक्ष असणार आहेत... सहकार कायद्यातील तरतुदींनुसार उपनिबंधकांकडून हे नियुक्तीचे आदेश देण्यात आलेत...

खरतर महाडिक गटाचा प्रभाव असलेल्या गोकुळमध्ये पाच वर्षांपूर्वी सत्तांतर झालं... काँग्रेसचे सतेज पाटील, राष्ट्रवादीचे हसन मुश्रीफ आणि विनय कोरे यांच्या आघाडीने गोकुळवर सत्ता मिळवली…

गोकुळवर प्रशासकाच्या एंट्रीनंतर पुन्हा एकदा राजकीय हालचालींना वेग आलाय...प्रशासक नेमण्याचा निर्णय सतेज पाटील–हसन मुश्रीफ यांना गोकुळमधून बाहेर करण्यासाठी भाजपनं आखलेली रणनिती असल्याची चर्चा आहे...

मात्र गोकुळचा निकाल लागल्यावरच याप्रकरणावर भाष्य करेन, अशी सावध भूमिका मुश्रीफांनी घेतलीय... तसचं प्रशासक बसवण्याचा निर्णय जाणीवपुर्वक घेण्यात आला नसल्याचा दावा महाडिकांनी केलाय.

मात्र गोकुळवर प्रशासक बसवण्यात आला असला तरी जोपर्यंत सतेज पाटील आणि हसन मुश्रीफ यांचा प्रभाव कमी होत नाही… तोपर्यंत भाजपला गोकुळवर आणि जिल्ह्यावर पकड मजबूत करणं कठीण असल्याचं राजकीय विश्लेषकांनी सांगितलयं... गोकुळ म्हणजे केवळ दूध संघ नाही… तर कोल्हापूरच्या अर्थकारणाच्या नाड्या नियंत्रित करणारी यंत्रणा आहे…अशावेळी सहकार टिकणार की राजकारण जिंकणार याकडे सर्वांचं लक्ष लागलंय़.