कोल्हापूरातील बहुप्रतीक्षित गोकुळ दूध संघाच्या पंचवार्षिक निवडणुकीसाठी अर्ज भरण्याची प्रक्रिया 15 सप्टेंबरपासून सुरू होणार आहे. गोकुळ दूध संघाचा निवडणुकीत महायुतीमधील संस्था पात्र अपात्रतेचा वाद संपल्यानंतर आता न्यायालयीन वाद निर्माण झालाय. कोल्हापूर सर्किट बेंच आणि विभागीय उपनिबंधकांच्या निर्णयानंतर अवसायनातील 492 दूध संस्थांना पात्र ठरवण्यात आलं आणि त्यांचा समावेश गोकुळच्या अंतिम मतदार यादीत करण्यात आलाय. मात्र, याच निर्णयाला आता सर्वोच्च न्यायालयात आव्हान दिल्यानं गोकुळ निवडणुकीत नवा ट्विस्ट समोर आलाय.. हा वाद काय आहे पाहूयात...

इस्पुर्ली येथील श्रीराम दूध संस्थेचे सदस्य रजनीकांत चेंडके यांनी राज्य सरकार आणि सहकार विभागाच्या निर्णयाविरोधात विशेष अनुमती याचिका दाखल केलीये. 492 दूध संस्थांचा अंतिम मतदार यादीतील समावेश कायम राहावा आणि त्यांचा मतदानाचा अधिकार अबाधित राहावा, यासाठी काँग्रेस आमदार सतेज पाटील यांनी पात्र दूध संस्थांना पाठबळ दिलंय.

कोल्हापुरात नुकत्याच झालेल्या 1400 दूध संस्थांच्या सत्यविजय मेळाव्यात मंत्री हसन मुश्रीफ यांच्या पाठीशी उभं राहण्याचा निर्धार व्यक्त करण्यात आला. एव्हंढच नव्हे तर 1400 दूध संस्था पात्र होऊ नयेत, यासाठी एक अदृश्य शक्ती काम करत असल्याचा गंभीर आरोप मेळाव्यात करण्यात आला.

तर दुसरीकडे, अदृश्य शक्तीचा आरोप करणाऱ्यांचा रोख नेमका कुणाकडे आहे ? हे जर स्पष्ट झालं तर त्यावर आम्ही सुद्धा उत्तर देऊ अशी प्रतिक्रिया भाजप नेत्या आणि गोकुळच्या माजी संचालिका शौमिका महाडिक यांनी दिलीये. एकीकडे राष्ट्रवादीचे नेते हसन मुश्रीम आणि भाजप नेते धनंजय महाडीक हे दोन्ही महायुतीचे नेते एकमेकांना शह देतायेत. दुसरीकडे गोकुळ दूध संघाच्या पंचवार्षिक निवडणुकीत न्यायालयीन वाद काही केल्या संपेना झालेत. अर्ज भरण्याची प्रक्रिया सुरू होण्यासाठी काही दिवस शिल्लक राहिलेले असताना पुन्हा न्यायालयीन वादाला तोंड फुटलंय. एकीकडे 492 संस्थांच्या पात्रतेचा प्रश्न सर्वोच्च न्यायालयात पोहोचलाय... तर दुसरीकडे पात्र ठरलेल्या 1400 संस्थांनी आपली राजकीय भूमिका स्पष्ट केलीये. त्यामुळे प्रतिष्ठेच्या या निवडणुकीत कोण बाजी मारणार ? याकडे जिल्ह्याचं लक्ष लागलंय.