कबुतरखान्यांचा मुद्दा शांत होण्याऐवजी आणखीनच तापलाय...विशेष म्हणजे आता हा मुद्दा मराठी विरूद्ध जैन असा रंगण्याची शक्यता आहे...कारण जैन समाजानं कबुतरांच्या मुद्यावरून थेट निवडणूकीच्या मैदानातच उतरण्याची तयारी सुरू केलीय. तर आम्ही गिरगावकर संघटनेनं आक्रमक पवित्रा घेतलाय. कबुतर गो बॅक मारवाड अशा आशयाची पोस्टर्स व्हायरल केले आहेत. त्यामुळे हा संघर्ष अधिक तीव्र होण्याची चिन्ह आहेत.

खरं तर मुंबईत 52 कबुतरखाने आहेत. या कबुतरांच्या विष्ठेमुळे श्वसनाचे गंभीर आजार होत आहेत... तरीही न्यायालयाच्या आदेशाला धुडकावून जैन इमारतीच्या छतावर भूतदयेच्या नावाखाली कबुतरांना दाणे घालतोय... त्यामुळे ठाकरेसेनेही आक्रमक झालीय..मरीन लाईन्स जवळच्या लोढांच्या क्लबमध्ये कबुतरखाना सुरु करा, असा टोला ठाकरेसेनेचे खासदार संजय राऊतांनी लगावलाय. तर सत्ताधारी भाजपनं सावध भूमिका घेतलीय.

हायकोर्टानंच कबुतर खान्यांवर बंदी घातली असली तरी जैन समाजानं आपला हेका कायम ठेवलाय. एवढंच नव्हे तर मंत्री लोढांनी जैन समाजाची नाराजी दूर करण्यासाठी प्रत्येक वॉर्डात कबुतर खाने सुरू करण्याची घोषणा केली होती. त्याला प्रत्युत्तर म्हणून आम्ही गिरगावकर संघटनेनं त्या कबुतरखान्यांसमोर चिकन-मटण शॉप सुरू करण्याचा इशारा दिला होता. आता थेट जैन समाजाला गो बॅक टू मारवाड राजस्थानचा नारा दिलाय. त्यामुळे हा वाद मराठी विरूद्ध जैन असा पेटणार असल्याचं दिसतंय. मात्र आगामी महापालिका निवडणुकीत कुणाला फायदा होणार आणि कुणाला फटका बसणार याची उत्सुकता आहे.