ऐकलंत काय म्हटली गौतमी. दहीहंडीतल्या याच डान्समुळे गौतमी वादात सापडलीय. कारण या अश्लील डान्समुळे गौतमी पाटीलविरोधात ठाण्यात तक्रार दाखल करण्यात आलीय. आधीच सण-उत्सावामधील अश्लील डान्सवरून वातावरण तापलेलं असतानाच आता अश्लील डान्सरवर कायदेशीर कारवाईची मागणी होऊ लागलीय. ठाण्यातील नगरसेविका मृणाल पेंडसे यांनी डान्सर गौतमी पाटील आणि कार्यक्रमाच्या आयोजकांवर गुन्हा दाखल करण्याची मागणी करत पोलिसात तक्रार दिलीय.

यापूर्वीच पुण्यातल्या अश्लील डान्समुळे डान्सर राधा पाटीलवर आणि आयोजकांवर गुन्हा दाखल करण्यात आलाय. दहीहंडीत अनेक राजकीय पक्षांनी भरसभेत डान्सरला नाचवून अश्लीलतेचा कळसचं गाठला. त्यामुळे आता रंगभूमी प्रयोग परिनिरीक्षण मंडळही सक्रीय झालयं. डान्सरना कार्यक्रम करण्यापूर्वी ‘योग्यता प्रमाणपत्र’ घेणं बंधनकारक करण्यात आलयं. अशातच डान्सर ऐश्वर्या जाधवनं योग्यता प्रमाणपत्र असतानाही कार्यक्रमासाठी दुसऱ्यांदा परवानगी नाकारल्याचा आरोप केलाय. तसेच कला सादर करणाऱ्यावर गुन्हे दाखल करणं चुकीचं आहे, असंही जाधव हीने म्हटलयं.

दहीहंडी आणि सार्वजनिक उत्सवांच्या नावाखाली सादर होणाऱ्या अश्लील डान्सवर एकीकडे महिला राजकारण्यांनी कठोर भूमिका घेतली असली तरी दुसरीकडे या डान्सरवरील बंधनांमुळे उपजीविका चालवण्यासाठी योग्यरित्या कला सादर करणाऱ्या इतर कलाकारांवर अन्याय होण्याची शक्यता नाकारता येत नाही. त्यामुळे आयोजकांनीही लावणीचं पावित्र्य राखत कार्यक्रमाचं आयोजन करणं गरेजचं आहे.