गणेश शिंगाडे 

गडचिरोली : घातपात करण्याच्या उद्देशाने गडचिरोलीच्या ताडगाव जंगल परिसरात रेकी करणाऱ्या जहाल माओवाद्यास गडचिरोली पोलीस दलाने अटक केली आहे. राष्ट्रीय तपास यंत्रणेकडे तपासावर असणाऱ्या खूनाच्या गुन्ह्यात पाहिजे असलेला हा आरोपी असून पोलिसांनी याला रेकी करताना ताब्यात घेतले आहे. दरम्यान पोलीस दलाने आतापर्यंत १०९ माओवाद्यांना ताब्यात घेतले आहे. 

गडचिरोली जिल्हा हा माओवादग्रस्त जिल्हा म्हणून ओळखला जातो. येथे माओवादी सरकारी मालमत्तेचे नुकसान करणे, सुरक्षा दलाच्या जवानांवर हल्ला करणे व इतर प्रकारच्या सरकारी कामात अडथळे आणून जाळपोळ करणे. याशिवाय देश विघातक कृत्य करत असतात. यामुळे या परिसरात दहशतीचे वातावरण असल्याचे पाहण्यास मिळत असते. दरम्यान घातपात घडवून आणण्याच्या उद्देशाने रेकी करत असलेल्या या माओवाद्याला पोलिसांनी ताब्यात घेतले आहे. 

अटकेवर २ लाखाचे होते बक्षीस 

सुरक्षा दलांविरुद्धच्या अनेक हिंसक कारवायांमध्ये सक्रिय सहभाग असलेल्या एका जहाल माओवाद्यास १३ सप्टेंबरला गडचिरोली पोलीस दलाने ताब्यात घेवून त्याला अटक केली आहे. महाराष्ट्र शासनाने त्याच्या अटकेवर २ लाख रुपयांचे बक्षीस जाहीर केले होते. गडचिरोली पोलीस दलाच्या प्रभावी माओवाद विरोधी कारवाईमुळे जानेवारी २०२२ ते आतापर्यंत एकूण १०९ माओवाद्यांना अटक करण्यात गडचिरोली पोलीस दलास यश आले आहे.

महिला नेता माओवाद्याचे आत्मसमर्पण  

जहाल महिला माओवादी नेता माओवाद्यांच्या सर्वोच्च केंद्र समितीची सदस्य असलेल्या सुजाताने तेलंगणा पोलिसांसमोर आत्मसमर्पण केले आहे. सुजाता ही १९८२ पासून माओवादी संघटनेत सक्रिय असून सुरुवातीच्या काळात गडचिरोली जिल्ह्यात अनेक वर्षातील सक्रिय होती. नंतर दंडकारण्यात तिने खूप महत्त्वाची भूमिका बजावली.अनेक हिंसक घटनांमध्ये तिचा प्रत्यक्ष सहभाग आहे. ती माओवाद्यांच्या संघटनेत महत्त्वपूर्ण असलेला नंतर पश्चिम बंगालमध्ये ठार झालेला मोठा माओवादी नेता किशन जी याची पत्नी असून तिच्यावर सगळ्या राज्यात मिळून चार कोटी पेक्षा जास्तीचं बक्षीस आहे. सुजाताच्या आत्मसमर्पणामुळे माओवादी संघटनेला मोठा हादरा बसला आहे.