मुंबई महापालिका निवडणुकीत भाजपचं विशेष प्रचार गीत वादाच्या भोवऱ्यात सापडलंय. कारण या गाण्यातील भगवा शब्दावर निवडणूक आयोगाने आक्षेप घेतलाय. आचारसंहितेचं उल्लंघन झाल्याचा ठपका ठेवत या गीताला परवानगी नाकारलीय.

दुसरीकडे निवडणूक आयोगानं यापूर्वीही लोकसभा निवडणुकीत शिवसेनेच्याही निवडणूक गीतातल्या भगवा शब्दाबरोबर 'जय भवानी-जय शिवाजी' आणि 'हिंदू' या शब्दांवर आक्षेप घेतला होता. मात्र ही बंदी जुमानणार नाही, असं खुलं आव्हान उद्धव ठाकरेंनी दिलंय. साम टीव्हीच्या ब्लॅक अॅण्ड व्हाईट या विशेष मुलाखतीत बोलताना त्यांनी निवडणूक आयोगावर घणाघाती टीका केली.

उद्धव ठाकरे यांनी शिवसेनेच्या गाण्यातील हे शब्द बदलण्यास नकार दिला होता. निवडणूक आयोगाच्या आचारसंहितेनुसार, धार्मिक भावना किंवा विशिष्ट रंगांचा राजकीय प्रचारात वापर करण्याबाबत कडक नियमावली आहे. महापालिका निवडणुकीसाठी आता फक्त एक आठवडा शिल्लक राहिला आहे. त्यामुळे मुंबईसह राज्यभरात प्रचाराची धामधूम सुरू आहे.

गल्लीबोळातील सभांपासून ते मोठ्या जाहीर सभांपर्यंत सर्वच पक्षांनी आपली पूर्ण ताकद लावली आहे. सध्या सोशल मीडिया, टीव्ही-डिजिटल मीडियावरील जाहिराती आणि घरोघरी जाऊन प्रचारावर भर आहे. मात्र महाराष्ट्राशी वर्षानुवर्ष जोडल्या गेलेल्या भगवा या शब्दाला आक्षेप घेतल्यानं राजकीय पक्षांची अडचण झाली आहे.