सोलापुरातील न्यूरोलॉजिस्ट डॉ. शिरीष वळसंगकर यांच्या आत्महत्येप्रकरणी मोठी अपडेट समोर आलीय. आरोपी मनिषा माने हिच्या पोलीस कोठडी वाढ करण्यात आलीय. आता या प्रकरणाची दुसरी बाजू लवकरच सर्वांसमोर येईल. डॉक्टर वळसंगकर प्रकरणी सोलापूर सत्र आणि दिवाणी न्यायालयाने २० तारखेला आरोपी मनिषा मानेला तीन दिवस पोलीस कोठडी सुनावली होती.

आज पोलीस कोठडी संपल्यानंतर आज पुन्हा न्यायलायात मनिषा मानेला हजर करण्यात आले होते. त्यानंतर न्यायालयाने आरोपी मनिषा मानेच्या पोलीस कोठडीत दोन दिवसांची वाढ करण्यात आलीय. हॉस्पिटलमधील कर्मचाऱ्यांकडून आरोपी मनीषा माने हिच्या विरोधात आणखी 27 तक्रारी दाखल झाल्याची माहिती पोलिसांनी दिलीय. त्यामुळे या तक्रारींची तपासणी करण्यासाठी अधिक तपास करणेकामी पोलीस कोठडी वाढवलीय.

पोलीस कोठडीत मनिषा मानेची पुन्हा चौकशी केली जाणार आहे, त्यामुळे वळसंगकर आत्महत्या प्रकरणी दुसरी बाजू देखील समोर येणार आहे.

मुलगा - सुनेच्या जबाबातून सगळी माहिती उघड

वळसंगकर यांच्या मुलाचा आणि सुनेचा पोलिसांनी जबाब नोंदवला होता. सुत्रांनी दिलेल्या माहितीनुसार, डॉ. शिरीष वळसंगकर यांनी काही वर्षांपूर्वी आपल्या हॉस्पिटलची पूर्ण सुत्रे मुलगा डॉ. आश्विन आणि सून सोनाली यांच्याकडे सोपवली होती. तर हॉस्पिटलमधील संपूर्ण कारभार हा प्रशासकीय अधिकारी म्हणून आरोपी मनीषा मुसळे-माने या बघत असल्याची माहिती समोर आलीय.

हॉस्पिटलमधील रुग्णांचे उपचार आणि प्रशासकीय कारभारामुळे डॉ.आश्विन आणि डॉ. सोनाली यांच्यावर मोठ्या प्रमाणावर ताण वाढलेला होता. त्यामुळे २०२५ साली डॉ. शिरीष वळसंगकर यांनी पुन्हा एकदा हॉस्पिटलची सूत्र स्वतःकडे घेतली होती. तेव्हा प्रशासकीय अधिकारी मनीषा मुसळे-माने हिच्या विरोधात काही आर्थिक गैरव्यवहारच्या तक्रारी डॉ. वळसंगकर यांच्याकडे आल्या होत्या.

आरोपी महिलेच्या वकिलाचा मोठा खुलासा

आरोपी महिलेने एक मेल डॉ. शिरीष वळसंगकर यांना केला होता. त्यात आपला पगार कपात केली जातेय. काही व्यक्तींचा ऐकून त्याच्यावर आरोप केले जातात, अधिकार कमी केले जात आहेत. याबाबत तिने तक्रार केली होती'. 'या मेलच्या अनुषंगाने डॉक्टरांनी दुसऱ्या दिवशी तिला बोलावलं. त्यावेळी महिलेने मेल करून चूक झाल्याची कबुली दिली. त्यावेळी माफी देखील मागितली होती, असा खुलासा मागील सुनावणीवेळी आरोपीच्या वकिलाने केला होता.