मंगेश मोहिते

नागपूर: कोरोनाने (Coronavirus) अनेक शेतकरी कुटुंबातील कर्ता पुरुष गमावले आहेत. सावनेर तालुक्यात साधारण 325 जणांचा मृत्यू झाला आहे. यात मृत्यू झालेल्यांमध्ये बहुतांश हे शेतकरी कुटुंबातील आहेत. याच कठीण प्रसंगात शेतकरी कुटुंबाना आधार देण्यासाठी मदतीचे एक पाऊल सावनेर कृषी उत्पन्न बाजार समितीने उचलले आहे. या कुटुंबाना मदत म्हणून पैसे देण्याऐवजी खरीप हंगामासाठी लागणारी शेती निविष्ठा देण्यात आली आहे.

राज्याचे पशुसंवर्धन मंत्री सुनील केदार यांच्या संकल्पनेतून हा उपक्रम राबविण्यात आला. आणि या उपक्रमअंतर्गत 112 कुटुंबाना ही मदत देण्यात आली आणि आज शेती निविष्ठा चं वाटप करण्यात आले. त्यांचा पाठीशी कुणीतरी खंबीर पाने उभं आहे अशी भावना यावी यासाठी हा उपक्रम राबविण्यात येत आहे.

असे या उपक्रमाबद्दल बोलताना मंत्री सुनील केदार म्हणाले. सावनेर येथील कृषी उत्पन्न बाजार समितीच्या आवारात मका कापूस पिकावरील कीड नियंत्रण करण्यासाठीचे शास्त्रज्ञांकडून मार्गदर्शन चर्चा सत्राचे आयोजन करण्यात आले. यावेळी राज्याचे पशुसंवर्धन मंत्री सुनील केदार, जिल्हा परिषदेच्या अध्यक्षा रश्मी बर्वे यांच्यासह उपाध्यक्ष मनोहर कुंभारे हे उपस्थित होते. यावेळी शेतकऱ्यांना विविध पिकांच्या बियांचे वाटप करण्यात आले.