धुळे : शिरपूर तालुक्यातील बोराडी गावातील एसबीआय बँकेचे एटीएम चोरट्यांनी फोडल्याची धक्कादायक घटना पहाटेच्या सुमारास उघडकीस आली आहे. या मशिनमधून अज्ञात चोरट्यांनी लाखो रुपये लंपास केल्याचा संशय व्यक्त करण्यात येत असून, पोलिसांकडून याचा तपास सुरु करण्यात आला आहे.

एटीएम (ATM) मशीन फोडून रक्कम लांबविण्याच्या घटनांमध्ये मागील काही दिवसात वाढ झाल्याचे पाहण्यास मिळत आहे. रात्रीच्या वेळी चोरट्यांकडून एटीएम मशीन लक्ष केले जात असून गॅस कटरच्या सहाय्याने मशीन फोडले जात आहे. असाच प्रकार पुन्हा एकदा शिरपूर (Shirpur) तालुक्यातील बोराडी या गावात घडला आहे. रात्री चोरट्यानी एसबीआय बँकेचे एटीएम फोडून यातील रक्कम लांबविली आहे. सदरची घटना आज सकाळी ग्रामस्थांच्या लक्षात आली. यानंतर ग्रामस्थांनी पोलिसांना याबाबतची माहिती दिली. 

दरम्यान अज्ञात चोरट्यांनी सदर एटीएम मशीन कॅबिनच्या काचा फोडून दरवाजा तोडला. तसेच गॅस कटरच्या सहाय्याने एटीएम मशीन फोडले (Crime news) आहे. संशयीत चोरट्यांनी एटीएम मशीन कॅबिन बाहेर काढून रस्त्यावर फोडल्याचे दिसून आले असून, एटीएममधून लाखो रुपये काढून पोबारा केला. यापूर्वी देखील शिरपूर येथे चोरट्यांनी एटीएम मशीनवर डल्ला मारण्याची घटना उघडकीस आली होती. घटनेची माहिती मिळताच घटनास्थळी सांगवी पोलिस दाखल झाले. घटनास्थळाची विविध तपास यंत्रणांच्या माध्यमातून तपास सुरू केला आहे.