धुळे : मुलीचे अपहरण करून मुलीच्याच कुटुंबियांना धमकावण्यात आले होते. या त्रासाला कंटाळून मुलीच्या वडिलांनी आत्महत्या केल्याची घटना धुळे जिल्ह्यात काल घडली होती. यानंतर आज नातलग व ग्रामस्थांनी मृताच्या अस्ती पोलीस ठाण्याच्या बाहेर आणत पोलीस प्रशासनाचा निषेध केला आहे. 

धुळे जिल्ह्यातील शिंदखेडा तालुक्यातील आक्कडसे गावातून एका अल्पवयीन मुलीचे अपहरण करण्यात आले होते. दरम्यान या अपहरण केलेल्या मुलीच्या कुटुंबियांना वारंवार मारहाण करून जीवे ठार मारण्याची धमकी अपहरणकर्त्यांकडून दिली जात होती. या त्रासाला कंटाळून मुलीच्या वडिलांनी अखेर गळफास घेऊन आत्महत्या केल्याचा धक्कादायक प्रकार काल उघडकीस आला होता.  

पोलीस प्रशासनाचा निषेध 

गेल्या काही महिन्यांपूर्वी अल्पवयीन मुलीचे अपहरण झाल्यानंतर वारंवार नातेवाईकांनी पोलीस अधिकाऱ्यांना मुलीचा तपास करण्याची विनवणी केली होती. परंतु मुलीचे अपहरण होऊन तब्बल सहा महिने उलटून देखील शिंदखेडा पोलीस प्रशासनातर्फे कुठल्याही प्रकारची ठोस भूमिका घेण्यात आली नसल्याचा आरोप यावेळी नातेवाईकांनी लावला आहे. शिवाय मुलीच्या कुटुंबियांना त्रास दिला जात असल्याची देखील दाखल घेण्यात आली नाही. यातूनच मुलीच्या वडिलांनी आत्महत्या केल्याचे सांगण्यात आले. 

नातेवाईक झाले संतप्त 

दरम्यान संतप्त ग्रामस्थांनी व कुटुंबीयांनी संबंधित मृत वडिलांच्या मृतदेहावर अंत्यसंस्कार करून त्यांच्या अस्ती आज थेट पोलीस ठाण्याच्या बाहेर नेऊन पोलीस अधिकाऱ्यांविरोधात निषेध आंदोलन केला. तसेच याचा जाब विचारला आहे. तर यानंतर तरी झोपलेल्या पोलीस प्रशासनाला जाग येईल का? असा संतप्त प्रश्न संतप्त कुटुंबीयांनी विचारला आहे.