धुळे : अवैध सावकारी प्रकरणी शहर पोलिस ठाण्यात शनिवारी (ता. १८) नववा गुन्हा दाखल झाला. यात साडेसात लाख घेतल्यानंतर १८ लाखांची परतफेड झाल्यावरही मुद्दल व व्याजाचा मुद्दा उकरून संबंधित अवैध सावकारांनी ५० हजाराच्या (Dhule News) खंडणीची मागणी केल्याचे फिर्यादीत नमूद आहे. त्यामुळे पठाणी वसुलीतून गरीब, गरजू सर्वसामान्य नागरिकांचे आर्थिक शोषण करणाऱ्यांवर पोलिसांनी (Police) कठोर कारवाई करावी, अशी मागणी फिर्यादींकडून होत आहे. (dhule news Tenth police case of illegal lending filed)

धुळे (Dhule) शहरात काही दिवसांतच अवैध सावकारी प्रकरणी पश्‍चिम देवपूर पोलिस ठाण्यात गर्भवती महिलेला मारहाण, आर्थिक गुन्हे शाखेकडे व्यावसायिकाला मारहाणीतून कर्णबधिर करणे, तसेच आझादनगर, शहर पोलिस आणि आर्थिक गुन्हे शाखेकडे मिळून राजेंद्र बंब याच्याविरुद्ध एकूण सहा गुन्हे, शहर पोलिस ठाण्यात गुरुवारी आणि शनिवारी मिळून रामबापू बागूल, नीलेश हरळ याच्याविरोधात दोन, असे मिळून आतापर्यंत एकूण दहा गुन्हे दाखल झाले आहेत. पोलिस अधीक्षक प्रवीणकुमार पाटील यांच्या आवाहनाला प्रतिसाद देत तक्रारदार पीडित नागरिक पुढे येत आहेत.

रामबापूचा दुसरा कारनामा

ट्रॅव्हल्स व्यावसायिकाने रामबापू बागूल व नीलेश हरळ याच्याविरोधात गुरुवारी गुन्हा दाखल केल्यानंतर शहरातील बिसलेरी बॉटलचे होलसेल विक्रेते हेमंतकुमार सुभाष पाटील (वय ३८) यांनी अवैध सावकार गणेश ऊर्फ रामबापू बागूल, नीलेश हरळ याच्याविरोधात शहर पोलिस ठाण्यात शनिवारी गुन्हा दाखल केला. तक्रारदार पाटील यांनी या संशयित दोघांकडून एकूण साडेसात लाखाचे रोख कर्ज सरासरी सहा ते दहा टक्के व्याजाने घेतले. त्यासाठी कोरे धनादेश दिले. त्यानुसार पाटील यांनी वेगवेगळ्या स्वरूपात या सावकारांना आतापर्यंत १८ लाख रुपये व्याजापोटी अदा केले. तरीही नऊ मेस रामबापू व हरळ याने पाटील यांच्या घरी जात व्याज व मुद्दल रक्कमेचा मोबदला मागितला आणि कोऱ्या धनादेशाच्या मोबदल्यात ५० हजाराची खंडणी मागितली. अन्यथा, पाटील यांचे हातपाय तोडून टाकू, अशी धमकी दिली. त्यामुळे पाटील यांनी बँक खात्यातून फोन पेव्दारे ५० हजाराची रक्कम या सावकारांना दिली. यात या सावकारांनी रामेश्वर बापू चौधरी यांच्याकडूनही पाटील यांना पैसे आणून दिल्याचे सांगितले, असे फिर्यादीत नमूद आहे.