धुळे : कोरोनामुळे अनेक महिन्‍यांपासून मंदीर बंद आहेत. आता हे बंद मंदीर उघडण्याच्या मागणीसाठी भाजपनंतर महाराष्‍ट्र नवनिर्माण सेनेतर्फे टाळ हाती घेण्यात आले आहे. धुळे मनसे महानगरच्यावतीने एकविरा देवीच्या मंदिराबाहेर टाळ वाजवून आंदोलन करण्यात आले. (dhule-news-temple-open-MNS-movement-ekvira-devi-temple)

कोरोनाचा प्रादुर्भाव रोखावा याकरीता मंदिर बंद ठेवण्यात आली होती. परंतु, आता कोरोनाचा प्रादुर्भाव कमी झाल्‍याने मंदिर उघडण्याच्‍या मागणीसाठी धुळे शहरातील एकविरा देवीच्या मंदिरा बाहेर मनसेतर्फे मंदिर उघडा आंदोलन करण्यात आले आहे.

राज्‍य शासनाविरोधात घोषणाबाजी

"हे उद्धवा अजब तुझे सरकार बंद मंदिर खुले बार" असं म्हणत मनसेच्यावतीने धुळे शहरातील एकविरा देवीच्या मंदिराबाहेर राज्य सरकारच्या विरोधामध्ये घोषणाबाजी करीत आंदोलन करण्यात आले आहे. राज्यात सर्व हॉटेल बार दारूची दुकाने उघडी करण्यात आली असून फक्त मंदिर वरच कोरोनाचे संकट घोंगावत आहे का? असा संतप्त प्रश्न विचारत मनसेच्या पदाधिकारी व कार्यकर्त्यांनी राज्य सरकारला मंदिर खुली करण्यासंदर्भात आंदोलन करून जागे करण्याचा प्रयत्न केला आहे.