धुळे : राज्‍य परिवहन महामंडळाच्‍या कर्मचाऱ्यांनी मध्‍यरात्रीपासून राज्‍यव्‍यापी संप पुकारला आहे. मागण्या मान्‍य होईपर्यंत बेमुदत संप सुरू राहणार असून धुळे विभागात देखील पुर्णपणे बंद ठेवण्यात आले आहे. यामुळे धुळे विभागातील सर्व बसचे स्‍टेअरींग लॉक झाले आहे.

राज्‍य परिवहन महामंडळाचे राज्य शासनाने विलगीकरण व्हावे; या मागणीसाठी धुळ्यात देखील आंदोलनाला सुरुवात झालेली आहे. रात्री बारा वाजेपासूनच एसटी कर्मचाऱ्यांनी संप पुकारला होता. जोपर्यंत राज्य शासनातर्फे मागणी मान्य होत नाही तोपर्यंत हा संप असाच सुरू ठेवणार असल्याची भूमिका कामगारांनी घेतली आहे.

एकही बस निघाली नाही बाहेर

धुळे मध्‍यवर्ती बसस्‍थानकात सकाळपासून या ठिकाणी प्रवाशांची देखील मोठ्या प्रमाणात गर्दी बघावयास मिळत असून रात्री बारा वाजेपासून धुळे मध्यवर्ती बसस्थानकातून एकही बस बाहेर निघाली नाही. यामुळे बाहेरगावी जाण्यासाठी बसस्‍थानकात आलेल्‍या प्रवाशांना परत जावे लागले. अनेकांनी खासगी वाहन करून गावी गेले.