धुळे : दहावीच्या परीक्षेला आजपासून सुरवात झाली आहे. परीक्षा सुरू झाल्यानंतर जिल्हा प्रशासनातर्फे कॉपीमुक्त परीक्षेसाठी भरारी पथक (Dhule News) नेमले आहेत. या भरारी पथकांची संख्या सहावरून ११ करण्यात आली आहे. (Maharashtra News)

महाराष्ट्र राज्य माध्यमिक व उच्च माध्यमिक शिक्षण मंडळातर्फे घेण्यात येणाऱ्या (SSC Exam) दहावीच्या परीक्षेला आजपासून सुरुवात झाली आहे. धुळे जिल्ह्यात परीक्षेसाठी ६६ केंद्र असून यातील १० केंद्र ही अतिसंवेदनशील जाहीर करण्यात आलेली आहेत. या अतिसंवेदनशील केंद्रावर ज्यादा पोलिस बंदोबस्त पोलीस प्रशासनातर्फे तैनात करण्यात आला असून, या ठिकाणी कुठल्याही प्रकारचा गैरप्रकार घडू नये याची खबरदारी पोलीस प्रशासनातर्फे घेतली जात आहे.

परीक्षेसाठी २८ हजार ४४७ विद्यार्थी प्रविष्ट झालेले आहेत. जिल्ह्यातील ६६ केंद्रापैकी धुळे शहरामध्ये १५, धुळे ग्रामीणमध्ये १६, साक्री तालुक्यात १३, शिरपूर तालुक्यात ९ व शिंदखेडा तालुक्यात १३ केंद्र आहेत. परीक्षा कॉपीमुक्त वातावरणात पार पडाव्या; यासाठी शिक्षण विभागासह जिल्हा प्रशासनातर्फे देखील तयारी करण्यात आलेली असून, यापूर्वी भरारी पथकांची संख्या सहा होती. परंतु आता परिस्थितीचे गांभीर्य लक्षात घेता भरारी पथकांची संख्या सहावरून ११ करण्यात आली आहे. त्यामुळे कॉपीबहाद्दरांचे धाबे चांगलेच दणाणले आहेत.