धुळे : शिरपूर (Shirpur) तालुका पोलीसांनी छापा टाकून शेतातील झोपडीत लपवून ठेवलेल्या गोणीतील सुमारे ९३ हजार ६०० रुपये किंमतीचा सुका गांजा पोलिसांनी जप्त केला. याबाबत एकावर गुन्हा दाखल करण्यात आला असून संबंधित संशयीत पोलीस येण्यापूर्वीच घटनास्थळातून पसार झाला आहे.

शिरपूर तालुका पोलीस स्टेशनचे साहाय्यक पोलीस निरीक्षक सुरेश शिरसाठ यांना सुका गांजा संदर्भात गोपणीय माहिती प्राप्त झाली होती. त्या माहीतीच्या आधारे शिरपूर तालुक्यातील लाकड्या हनुमान येथील रामा रूमाल्या पावरा याने चिलारे, टिटावापाणी गावाचे शिवारात धरणाजवळ असलेल्या शेतातील झोपडीत सुका गांजा अमली पदार्थाचा साठा केल्याचे लक्षात आले होते. त्यानुसार पोलीस पथक घटनास्थळी दाखल झाले. सदर झोपडीवर छापा टाकला असता यात झोपडीत ठेवलेल्या गोणीत ९३ हजार ६०० रूपये किंमतीच्या ९.३६० किलो ग्रँम वजनाचा गांजा अंमली पदार्थ मिळुन आला आहे. पुढील कारवाई शिरपूर तालुका पोलीस करीत आहेत.