भूषण अहिरे

धुळे : विधानसभेत गैरकृत्य केल्याचा ठपका ठेवत भाजपच्या बारा आमदारांना एक वर्षासाठी निलंबनाची कारवाई केली. या कारवाईनंतर याचे पडसाद धुळ्यात उमटण्यास सुरुवात झाली असून आज भाजपच्‍यावतीने भास्‍कर जाधव यांच्‍या प्रतिमेस जोडे मारा आंदोलन करत निषेध करण्यात आला. (dhule-news-bjp-strike-and-bhaskar-jadhav-image-jode-mar-aandolan)

विधानसभेत विरोधी पक्षनेते देवेंद्र फडणवीस यांना ओबीसी आरक्षणावर बोलू दिले नाही. म्हणून त्याचा जाब विचारत असताना धुळे जिल्ह्यातील शिंदखेड्याचे आमदार जयकुमार रावल यांच्यासह बारा आमदारांचे निलंबन करून सरकारने भाजपचे संख्याबळ कमी करण्याचा प्रयत्न केल्याचा आरोप भाजपच्या कार्यकर्त्यांनी करत, त्‍याच्‍या निषेधार्थ धुळे जिल्हा भारतीय जनता पक्षाच्यावतीने जिल्हाध्यक्ष नारायण पाटील यांच्या नेतृत्वाखाली दोंडाईचा येथील शिवाजी महाराज यांच्या पुतळ्याजवळ ठाकरे सरकारचा निषेध केला.

तालिकाध्‍यक्ष भास्कर जाधव यांच्या प्रतिमेला जोडे मारून त्याची प्रतिमा जाळून निषेध नोंदवला आहे. यावेळी मोठ्या संख्येने जमलेल्या भाजपच्या कार्यकर्त्यांनी व पदाधिकाऱ्यांनी महाविकास आघाडी सरकारच्या विरोधात मोठ्या प्रमाणात घोषणाबाजी करीत आक्रोश व्यक्त केला आहे.