धुळे : राष्ट्रवादी काँग्रेस पक्षातर्फे गुरूवारी महापालिका प्रशासनाच्या विरोधामध्ये शरम करो आंदोलन करण्यात आले होते. या आंदोलनावेळी राष्ट्रवादीचे मोठ्या संख्येने पदाधिकारी व कार्यकर्त्यांनी महापालिकेच्या पायऱ्यांवर बसून प्रशासनाच्या विरोधात घोषणाबाजी करीत आंदोलन केले होते. लोक सेवकाने दिलेल्या आदेशाची अवहेलना केल्याबद्दल राष्ट्रवादी काँग्रेस पक्षाच्या आंदोलकांवर धुळे शहर पोलिस ठाण्यामध्ये गुन्हा दाखल करण्यात आला आहे. (dhule-corporation-news-fir-filed-against-NCP-activists-agitation-was-against-Dhule-Corporation)

संपूर्ण शहरात एलईडी पथदिवे लावण्याचा ठेका धुळे महापालिकेने गुजरातमधील वल्लभ इलेक्ट्रिकल्सला तब्बल १३ कोटींना दिला आहे. जवळपास १७ हजार पोलवर हे लाईट बसविले जाणार होते. मात्र, प्रत्यक्षात ठेकेदार आणि मनपातील अधिकारी, पदाधिकारी यांनी संगनमताने या ठेक्यात घोळ केला असून शहर अंधारात आहे. मनपात २१ कोटी रुपयांची लाईट खरेदी दाखविताना व्यवहारात अनियमितता असून लाईट बदलताना प्रत्यक्षात सुरु असलेले ८ हजार बल्ब काढण्यात आले. ते गेले कुठे? असा सवाल उपस्थित करुन हे बल्ब परस्पर विकले गेल्याने त्याची चौकशी करण्याची मागणी राष्ट्रवादीने केली होती. या आंदोलनानंतर धुळे शहर पोलिस ठाण्यामध्ये आंदोलकांवर गुन्हे दाखल करण्यात आले आहेत.