पिंपळनेर (धुळे) : खराब रास्ता असताना देखील कार भरधाव वेगाने चालवत असताना, कार अनियंत्रित झाली. यामुळे समोरून येणाऱ्या दुचाकीला जोरदार धडक दिली. दुचाकीवर असलेल्या तिघांपैकी दोघांचा जागीच मृत्यू झाला आहे. तर एक जण गंभीर जखमी झाला असून त्याला धुळे येथे उपचारासाठी दाखल करण्यात आले आहे. 

पिंपळनेर- सटाणा या रस्त्यावर हा भीषण अपघात १४ सप्टेंबरला रात्रीच्या सुमारास घडला. कार चालक पिंपळनेरहून सटाण्याकडे जात असताना रस्त्याच्या परिस्थितीकडे दुर्लक्ष करून भरधाव जात होता. यातच त्याने समोरून येणाऱ्या दुचाकीला जोरदार (Accident) धडक दिली. यात पिंपळनेरमधील रामनगरमधील रहिवासी राहुल गुलाब लाडे (वय २२) व लोकेश चंद्रकांत जाधव (वय २०) यांचा मृत्यू झाला. गंभीर अवस्थेत त्यांना पिंपळनेर ग्रामीण रुग्णालयात नेले असता डॉक्टरांनी त्यांना तपासून मृत घोषित केले. 

अन्य एक जखमी 

सदर अपघातात जय पद्माकर सोनवणे (वय २२) हे देखील गंभीर जखमी झाला असून त्याला धुळे येथे हलविण्यात आले आहे. तर दोघांचा मृत्यू आणि अपघाताची माहिती न देता कारचालक वाहन जागेवर सोडून पळून गेला. या कार चालकाविरुद्ध पिंपळनेर पोलिसांत गुन्हा दाखल करण्यात आला आहे.