बभळाज (धुळे) : शिरपूर– चोपडा रस्त्यावर तरडी ते बभळाज गावादरम्यान गुजरातमधील परिवहनच्या बसने धडक (Accident) दिल्याने तरडी (ता. शिरपूर) येथील दुचाकीवरील (Shirpur) दोघे ठार झाले. हा अपघात १० मे रोजी रात्रीच्या सुमारास घडला. याबाबत थाळनेर पोलिस ठाण्यात नोंद करण्यात आली आहे. (Live Marathi News)

तरडी (ता. शिरपूर) येथील रहिवासी असलेले भागवत कालिदास पाटील (वय ४५) व विलास मंगल पाटील (वय ४०) हे दोन्ही तरूण रात्री ८ ते ९ च्या सुमारास दुचाकीने बभळाजकडून तरडीकडे जात होते. या दरम्‍यान समोरून येणाऱ्या गुजरात परिवहनच्या चोपडा- अहमदाबाद बसने तरडी ते बभळाज गावाच्या दरम्यान दुचाकीला धडक दिली. ही धडक इतकी जोरदार होती, की अपघातात दुचाकीचा चक्काचूर होऊन दोन्ही तरूण गंभीर जखमी झाले.

अपघाताचे वृत्त समजताच तरडी व बभळाज येथील नागरिकांनी धाव घेत जखमींना तातडीने उपजिल्हा रुग्णालयात हलविले. वैद्यकीय अधिकाऱ्यांनी तपासून दोघांना मृत घोषित केले. अपघाताची माहिती थाळनेर (Police) पोलिसांना कळताच पोलिस अधिकारी सहकाऱ्यांसह दाखल झाले. दोन्ही तरूणांच्‍या अपघाती निधनामुळे परिसरात हळहळ व्यक्त करण्यात येत आहे.