बालाजी सुरवसे 

धाराशिव : धाराशिव तालुक्यातील येडशी येथील रामलिंग तीर्थक्षेत्राठीकाणी अनेक भाविक येत आहेत. येथे येणाऱ्या भाविकांसाठी पार्किंगची सुविधा करण्यात आली आहे. गाडी पार्किंग करताना त्याचे पैसे द्यावे लागतात. मात्र पार्किंगचे पैसे दिले नाही म्हणून येथील ठेकेदाराने चक्क मोटारसायकलवर बसलेल्या महिलेची ओढणी ओढल्याचा धक्कादायक प्रकार समोर आला आहे. 

श्रावण महिना असल्याने येडशी येथील रामलिंग तीर्थक्षेत्राच्या ठिकाणी (Dharashiv News) राज्यभरातुन पर्यटक व भाविक मोठ्या संख्येने येत असतात. भाविकांची गर्दी अधिक होत असल्याने पार्किंगसाठी स्वतंत्र व्यवस्था करण्यात आली आहे. या ठिकाणी येडशी ग्रामपंचायतच्या माध्यमातून पार्कीगसाठी टेंडर काढण्यात आले आहे. मात्र पार्किंगचे टेंडर दिलेल्या ठेकेदाराचा मनमानी कारभार येथे नेहमीच पाहायला मिळतो. दरम्यान आज चक्क महिलेची ओढणी ओढल्याचा प्रकार समोर आला असल्याने या प्रकारामुळे भाविकांतुन मोठी नाराजी व्यक्त करण्यात येत आहे.

गाडी पार्किंग केल्यानंतर पार्किंगचे पैसे दिले नाही म्हणून मोटरसायकलवर पाठीमागे बसलेल्या महिलेची ओढणी ओढण्याचा धक्कादायक प्रकार येडशी येथील रामलिंग येथे घडल्याच समोर आला. यानंतर महिलेची ओढणी ओढल्यावरून वाद होऊन भांडण झाले. हे भांडण सोडणाऱ्या भाविकालाही मारहाण करण्यात आली आहे.