बालाजी सुरवसे 
धाराशिव : विधानसभा निवडणुकीत उमेदवारांच्या प्रचाराला सुरवात झाली असून यात उमेदवारांकडून मतदारांना आश्वासन दिले जातात. त्यानुसार मतदार संघातील विकास कामे न झालेले गाव दाखवा आणि एक लाख रुपये बक्षीस मिळवा; असं थेट चॅलेंज आरोग्यमंत्री डॉ. तानाजी सावंत यांनी मतदारांना दिला आहे.

विधानसभा निवडणुकीत (Vidhan Sabha Election) प्रत्येक मतदारसंघात लढती जवळपास निश्चित झाल्या आहेत. तर अर्ज माघारीनंतर प्रचाराला सुरवात करण्यात आली आहे. त्यानुसारच राज्याचे आरोग्यमंत्री डॉ. तानाजी सावंत (Tanaji Sawant) यांनी देखील आपल्या प्रचाराला सुरवात केली असून प्रचारादरम्यान त्यांनी थेट मतदारांना ओपन चॅलेंज दिले आहे. भूम परंडा विधानसभा मतदारसंघात सावंत यांची शरद पवार राष्ट्रवादी काँग्रेसच्या राहुल मोटे यांच्याशी लढत आहे.

सर्वाधिक विकास कामे केल्याचा दावा 

गेल्या सात वर्षात सर्वाधिक विकास कामे केली. मतदारसंघात दीडशे ते दोनशे कोटी रुपये विकास निधी आणला; असा दावाही सावंत यांनी केला आहे. सावंत यांनी विधानसभेच्या प्रचाराला सुरुवात केली असून त्यांचा गाव भेट दौरा सुरू आहे. या दौऱ्यात सावंत मतदारांना हे चॅलेंज देत आहेत. सावंत यांच्या या चॅलेंजची सध्या मतदारसंघात जोरदार चर्चा सुरू आहे.