बालाजी सुरवसे 

धाराशिव : तीर्थस्थळी जाऊन देवदर्शन करण्यासोबतच भाविक मंदिरात भरभरून दान करत आहेत. त्यानुसार दिवाळीच्या सुटीच्या कालावधीत महाराष्ट्राची कुलस्वामिनी तुळजाभवानी मातेच्या दर्शनासाठी लाखोंच्या संख्येने भाविक गेले होते. या भाविकांमार्फत सोने- चांदीच्या दागिन्यांसह रोख रकमेचे दान करण्यात आल्याने मंदिराला पावणेतीन कोटींचे उत्पन्न मिळाले आहे. 

दिवाळी व सणाची सुट्टी सुरू झाल्यानंतर तुळजाभवानी देवीच्या (Tuljabhavani Mandir) दर्शनासाठी येणाऱ्या भाविकांची संख्या वाढली होती. दरम्यान पेड दर्शनासाठी देखील भाविकांची मोठी रांग होती. पेड दर्शनाच्या माध्यमातून मंदिराला कोट्यावधी रुपयांचे उत्पन्न प्राप्त झाले असुन उर्वरित उत्पन्न हे सिंहासन पेटी, गुप्तदान पेट्या, देणगी व विविध कर यातुन मिळत असते. या कालावधीत लाखो भाविकांनी तुळजाभवानीचे दर्शन घेऊन देणगी अर्पण केली आहे.

तुळजाभवानी मातेच्या चरणी दिवाळीच्या पंधरा दिवसांच्या सुट्टीत भाविकांनी दर्शनासाठी मोठी गर्दी केली होती. या कालावधीत लाखो भाविक दर्शनासाठी येऊन गेले असून तुळजाभवानी मंदीर संस्थानला २ कोटी ८४ लाखांचे उत्पन्न प्राप्त झाले आहे. यात भाविकांनी सुमारे ६५३ ग्रॅम सोने (Gold) व १३ किलो चांदी देखील अर्पण केली आहे.