ऐकलंत... माजी मंत्री धनंजय मुंडेंनी पुन्हा एकदा मंत्रिपद गेल्याची खंत व्यक्त केलीये. आम्ही दोघं बहीण-भाऊ मंत्री झालो मात्र एकाला घरी बसावं लागलं, अशी खदखद त्यांनी पुन्हा एकदा बोलून दाखवलीये. मात्र यावेळी त्य़ांनी येणारा काळ आपलाच असं म्हणत मंत्रिमंडळातील कमबॅकचे सूचक संकेत दिलेत. विशेष म्हणजे त्यांच्या बहिण पर्यावरण मंत्री पंकजा मुंडेंनीही मिळालेल्या खात्यासंदर्भात खंत व्यक्त केलीये.

खरंतर, बीडमधील सरपंच संतोष देशमुख हत्याप्रकरणानंर बीडमधील गुन्हेगारी चर्चेचा विषय ठरली. आरोपी वाल्मिक कराडशी निकटचे संबंध असल्याच्या आरोपावरुन बीडचे तत्कालीन पालकमंत्री धनंजय मुंडेंना आपल्या मंत्रि‍पदाचा राजीनामा द्यावा लागला. त्यामुळे गेल्या दोन वर्षांपासून धनंजय मुंडे मंत्रिपदापासून दूर आहेत. मात्र त्यांनी वारंवार जाहीरपणे मंत्रिपद गेल्याची खंत व्यक्त केली होती. मात्र त्यांची आशा मावळली नाही.

कारण,अजितदादांच्या निधनानंतर राष्ट्रवादीच्या वाट्याचं अर्थमंत्रीपद मुख्यमंत्र्यांकडे आहे. दुसरीकडे मंत्रालयातील लाचखोरी आणि इतर घटनांमुळे मंत्री नरहरी झिरवाळही वादात सापडले होते. अकार्यक्षम मंत्र्यांना डच्चू देण्याचा महायुतीच्या नेत्यांचा प्रयत्न असू शकतो. या पार्श्वभूमिवर मंत्रीमंडळाचा विस्तार झाला तर मुंडेंना संधी मिळू शकते का? मुंडेंची राजकीय फरफट थांबणार का? हे पाहणं महत्त्वाचं असणार आहे....