बीड- जिल्ह्यात जिल्हाधिकारी राधाबिनोद शर्मा यांनी, 10 फेब्रुवारीच्या मध्यरात्री पासुन जमावबंदीचे (Curfew) आदेश काढले आहेत. याच आदेशाला परळीतून शिवभक्तांचा विरोध पाहायला मिळत आहे. शहरातील राणी लक्ष्मीबाई टॉवर या ठिकाणी शिवभक्तांनी विरोध दर्शवत निदर्शन करत प्रशासनच्या विरोधात घोषणाबाजी देखील केली. अवघ्या काही दिवसांवर छत्रपती शिवाजी महाराज यांची जयंती आहे आणि बीड जिल्ह्याच्या जिल्हाधिकार्यांनी अचानक पणे जमावबंदी लागू केली आहे.

हे देखील पहा -

हा जमावबंदीचा आदेश आम्हाला मान्य नाही. जाणते राजे छत्रपती शिवाजी महाराज यांचा जयंती उत्सव हा कोरोनाच्या कालावधीनंतर, या वर्षी मोठ्या थाटामाटात साजरा होणार असताना अशा पद्धतीने निर्बंध लादल्यामुळे शिवभक्तांमध्ये तीव्र नाराजी व्यक्त केली जात आहे. त्यामुळं जिल्हाधिकार्यांनी हा आदेश तात्काळ मागे घ्यावा. अन्यथा तीव्र स्वरूपाचे आंदोलन करू. असा इशारा शिवप्रेमी सचिन स्वामी याने दिला आहे. दरम्यान यासंदर्भातील निवेदन परळी तहसीलदार यांना देण्यात आले आहे. यावेळी मोठ्या प्रमाणात शिवभक्त उपस्थित होते.