संजय जाधव

बुलढाणा: बुलडाणा जिल्ह्यात श्रेणी-2 चे पशु वैद्यकीय उपचार केंद्र जास्त असल्यामुळे त्या ठिकाणी फक्त जनावरांवर प्राथमिक उपचार केला जातो, त्यामुळे शेतकऱ्यांची गैरसोय होऊन आर्थिक भुर्दंड सोसावा लागत आहे. परिणामी जनावरांना उशिरा उपचार मिळाल्याने पशु हानी देखील होते आहे. त्यामुळे जिल्ह्यातील श्रेणी-2 च्या पशुवैद्यकीय केंद्रांना श्रेणी-1 चा दर्जा देण्याची मागणी स्वाभिमानी शेतकरी संघटनेच्या वतीने जिल्हा पशु संवर्धन अधिकाऱ्यांकडे करण्यात आली आहे.

हे देखील पहा-

जिल्ह्यामध्ये एकूण 122 पशुवैद्यकीय उपचार केंद्र असून त्यापैकी फक्त 35 केंद्र हे श्रेणी-1 चे असून इतर सर्व उपचार केंद्र हे श्रेणी-2 चे आहेत, त्यामुळे या श्रेणी-2 च्या केंद्रांना श्रेणी-1 चा दर्जा द्यावा, त्याचबरोबर जनावरांसाठी मुख्यालयी एक्स-रे मशीन, सोनोग्राफी मशीन व रोग निदानासाठी सुसज्ज अशी प्रयोगशाळा उभारण्यात यावी.

जणेकरून जनावरांच्या आजाराचे तात्काळ निदान होऊन त्यांच्यावर उपचार केले जातील आणि पशुपालकांचे आर्थिक नुकसान टाळले जाईल. अशी मागणी निवेदनाद्वारे करण्यात आली आहे, मागण्या मंजूर न झाल्यास स्वाभिमानी शेतकरी संघटनेच्या वतीने तीव्र आंदोलनाचा इशारा देण्यात आला आहे.

Edited By-Sanika Gade