Darshana Pawar Death Case : राजगड किल्ल्याच्या पायथ्याला मृतावस्थेत सापडलेल्या दर्शना पवार हिचा खून झाल्याची माहिती शवविच्छेदन अहवालातून उघड झाली आहे. दर्शनासोबत राजगड येथे गेलेला तिचा मित्र राहुल हंडोरे हा देखील तेंव्हापासून बेपत्ता आहे. दर्शना पवार ही मूळ अहमदनगर जिल्ह्यातील कोपरगावची असून बेपत्ता राहुल हंडोरे हा नाशिकच्या सिन्नर तालुक्यातील शहा गावाचा रहिवासी असल्याचं तपासातून समोर आलंय.

MPSC परीक्षेत राज्यात तिसरी आलेल्या दर्शनाच्या मृत्यूने तिच्या कुटुंबियांना मोठा धक्का बसला आहे. आरोपींना लवकरात लवकर शोधून कठोर शिक्षा द्याववी अशी मागणी कुटुंबीयांनी केली आहे. घटना घडल्यापासून दर्शनासोबत असलेला तिचा मित्र राहुल हंडोरे हा बेपत्ता आहे. त्यामुळे पुणे पोलीस त्याचा शोध घेत आहेत.

राहुल नाशिक जिल्ह्यातील रहिवाशी

राहुल हंडोरे हा नाशिक जिल्ह्याच्या सिन्नर सिन्नर तालुक्यातील शहा गावाचा रहिवासी असल्याची माहिती समोर आली आहे. मात्र त्याच्या घराला कुलूप असून घरी शुकशुकाट असल्याचं आढळून आले आहे. राहुलचा शोध लागल्यानंतरच हत्येचा उलगडा होणार आहे. (Marathi Tajya Batmya)

राहुल हंडोरे नेमका कुठे आहे?

पोलिसांना चौकशीदरम्यान राजगडाजवळील एका हॉटेलचे सीसीटीव्ही फुटेज चेक केलं. या सीसीटीव्ही फुटेजमध्ये राहुल हंडोरे दर्शनासोबत राजगडा जाताना दिसत आहे. मात्र खाली येताना राहुल एकटाच दिसत आहे. त्यामुळे संशयाची सुई आता राहुल हांडोरेकडे वळली आहे. राहुलच्या मोबाईलचं शेवटचं लोकेशन परराज्यात दाखवलं गेलं आहे. तसेच राहुलच्या खात्यावरून काही एटीएम व्यवहार झाल्याची माहिती देखील समोर आली आहे. (Crime News)

पोलिसांची ५ पथकं घेताय शोध

राहुलच्या शोधासाठी पोलिसांनी पाच पथकं तयार केली आहेत. पोलीस राहुल हंडोरेच्या जवळच्या लोकांची देखील चौकशी करणार असल्याचीही माहिती मिळत आहे. राहुलचा फोन सध्या बंद आहे, त्यामुळे तो नेमका कुठे आहे याचा शोध घेण्याचं मोठं आव्हान पोलिसांसमोर असणार आहे. (Latest Marathi News)