चेतन व्यास, वर्धा

Wardha: वर्धा शहरात रेकॉर्डवरील गुन्हेगार राकेश पांडे आणि आदील शेख यांच्या दोन गटांत मंगळवारी रात्री ११.३० ते १२ वाजताच्या जोरदार फिल्मी राडा झाला झाल्याची घटना घडली आहे. यावेळी एका गुन्हेगाराने हवेत फायरींग देखील केली. या सशस्त्र हाणामारीत एका गटातील गुन्हेगार गंभीर जखमी झाला असून त्याच्यावर सेवाग्राम येथील रुग्णालयात उपचार सुरु आहे. (Latest Marathi News)

याबाबत समोर आलेल्या माहितीनुसार, बोरगाव येथील रहिवासी अक्षय पटले याला चार दिवसांपूर्वी विकास पांडे याने शिवीगाळ केली होती. अक्षयने ही बाब आदिल शेख याला सांगितली. आदिलने विकास पांडेला फोन करुन शिवीगाळ का केली याबाबत जाब विचारला मात्र, दोघांमध्येही फोनवरुन झालेल्या संभाषणातही वाद झाला. याबाबतची माहिती विकास पांडेने राकेश पांडेला दिली.

या वादानंतर जुने वैमनस्य संपवून पुन्हा एकत्र येण्यासाठी स्टेशनफैल परिसरातील नूरी मस्जीद परिसरात बैठक घेऊन चर्चा करण्याचे ठरले. २८ रोजी रात्री ११.३० वाजताच्या सुमारास आदिल शेख, शोएब पठाण, गौरव विरखडे, छोटू उपाध्याय, संजय जैस्वाल हे स्टेशनफैलात सशस्त्र पोहचले. तसेच दुसऱ्या गटातील अजिंक्य बोरकर, राकेश पांडे, राहूल मडावी, गणेश पेंदोर, विकास पांडे, दादू भगत, रितीक तोडसाम, समीर दालगरम यांच्यासह दोन ते तीन युवक घटनास्थळी पोहचले.

मात्र, दोन्ही गट आमने सामने येताच त्यांच्यात सशस्त्र हाणामारी सुरु झाली. काहींनी हातात फरशा तर धारदार शस्त्र घेऊन एकमेकांना मारहाण सुरु केली. दरम्यान गणेश पेंदोर याने जवळील पिस्टल काढून हवेत गोळीबार केला. या हाणामारीत अजिक्य बोरकर गंभीर जखमी झाला. पोलिसांनी दोन्ही गटातील गुन्हेगारांविरुद्ध गुन्हा दाखल करीत एका गटातील पाच तर दुसऱ्या गटातील दोन आरोपींना रात्रीच अटक केली.

दरम्यान, दोन्ही गटातील युवकांविरुद्ध शहर तसेच रामनगर पोलिस ठाण्यात विविध गंभीर स्वरुपाचे गुन्हे दाखल आहेत. मागील काही वर्षांपासून दोन्ही गटात वर्चस्ववादातून हाणामारीच्या घटनाही घडलेल्या आहेत. ही घटना देखील जुन्या वैमनस्यातून झाल्याने शहरात पुन्हा एकदा गुन्हेगारी फोफावत चालल्याचे चित्र दिसून येत आहे. (Wardha)