रणजित माजगांवकर, साम टिव्ही

Kolhapur Crime News : अनैतिक प्रेमसंबधामध्ये अडसर ठरणाऱ्या पतीचा पत्नीने आपल्या प्रियकरासोबत मिळून काटा काढला. हत्येचा प्रकार उघड होऊ नये, म्हणून पतीचं शीर धडावेगळं करून ते वारणा नदीत फेकून दिलं. कोल्हापुरात २००१ साली हा धक्कादायक प्रकार घडला होता. याप्रकरणी कोर्टाने मृत व्यक्तीच्या पत्नीसह ८ आरोपींना जन्मठेपेची शिक्षा ठोठावली आहे. (Latest Marathi News)

सर्व आरोपींना जन्मठेपेची शिक्षा झाल्याचं कळताच, आरोपीच्या नातेवाईकांनी संताप व्यक्त केला. त्यामुळे कोल्हापूर कोर्टाच्या बाहेर काही काळ तणावाचं वातावरण निर्माण झालं होतं. अखेर पोलीसांनी (Police) कडक बंदोबस्तात सर्व आरोपींना कारागृहात नेलं. कोर्टाच्या या निर्णयाचे जिल्ह्यात कौतुक होत आहे.

काय घडलं होतं?

कोल्हापुरातील (Kolhapur) लाईन बाजार परिसरात राहणाऱ्या नितीन पडवळे याची दुसरी पत्नी लीना पडवळे हिचे रवी माने या व्यक्तीसोबत अनैतिक संबंध प्रस्थापित झाले होते. नितीन पडवळे त्यांच्या प्रेमप्रकरणात आड येत असल्याने पतीची हत्या (Crime News) करण्याचा लॅन लीना पडवळे आणि तिचा प्रियकर रवी माने यांनी केला.

२००१ साली त्यांनी नितीन पडवळे याला कोल्हापूर जिल्ह्यातील अंबा परिसरात नेऊन त्याच्या अपहरणाचा बनाव रचला. तसंच इतर नऊ आरोपींना घेऊन या सर्वांनी नितीन पडवळची निर्गुण हत्या केली. हत्येचा प्रकार उघड होऊ नये यासाठी पुरावा नष्ट करण्यासाठी या सर्व आरोपींनी नितीन पडवळे याचं शीर धडा वेगळं करून ते वारणा नदीत फेकून दिलं.

याप्रकरणी कोल्हापूर पोलिसांनी एकूण ११ आरोपी निश्चित केले होते. मात्र या प्रकरणातील दोन आरोपी सुरुवातीपासूनच फरार झालेत तर एका आरोपीचा या कालावधीत मृत्यू झालेला आहे. या प्रकरणाची आज अंतिम सुनावणी होती. कोल्हापूर जिल्हा सत्र न्यायालयाने आज या प्रकरणातील आठ आरोपींना जन्मठेपेची शिक्षा सुनावली.

यामध्ये नितीन पडवळे यांच्या पत्नीचा देखील सहभाग आहे. या खटल्याची आज सुनावणी होणार असल्याने सर्व आरोपींचे नातेवाईक मोठ्या प्रमाणात न्यायालय परिसरात जमले होते. या सर्व आरोपींना जन्मठेपेची शिक्षा झाल्याचं कळताच आरोपीच्या नातेवाईकांनी संताप व्यक्त केला प्रचंड पोलीस बंदोबसात या सर्व आरोपींना कारागृहाकडे नेण्यात आलं.

Edited By - Satish Daud