Jaiprakash Chhajed Passed Away At Nashik : काँग्रेसचे ज्येष्ठ नेते आणि इंटकचे प्रदेशाध्यक्ष माजी आमदार जयप्रकाश छाजेड यांचं निधन झालं. नाशिक येथील खासगी रुग्णालयात त्यांच्यावर उपचार सुरू होते. उपचारादरम्यान, मंगळवारी रात्री उशिरा त्यांची प्राणज्योत मालवली.

इंटकचे प्रदेशाध्यक्ष आणि काँग्रेसचे ज्येष्ठ नेते माजी आमदार जयप्रकाश छाजेड यांना प्रकृती अस्वास्थ्यामुळे नाशिकच्या खासगी रुग्णालयात उपचारासाठी दाखल करण्यात आले होते. उपचार सुरू असतानाच, मंगळवारी रात्री उशिरा त्यांची प्राणज्योत मालवली. त्यांचे पार्थिव अंत्यदर्शनासाठी काँग्रेस भवनमध्ये ठेवण्यात येणार आहे. बुधवारी संध्याकाळी त्यांच्या पार्थिवावर अंत्यसंस्कार करण्यात येणार आहेत.

काँग्रेसचे ज्येष्ठ नेते असलेले जयप्रकाश छाजेड हे कामगार चळवळीत सक्रिय होते. इंटकचे ते प्रदेशाध्यक्ष होते. काँग्रेस पक्षात त्यांनी शहर आणि राज्य पातळीवर अनेक संघटनात्मक पदे भूषवली होती. नाशिकच्या राजकीय, सामाजिक आणि सांस्कृतिक चळवळीतील प्रमुख नेते म्हणून त्यांची ओळख होती.

जयप्रकाश छाजेड यांच्या पश्चात पत्नी आणि दोन मुले आहेत. दरम्यान, नाशिक येथील काँग्रेस भवनात बुधवारी छाजेड यांचे पार्थिव अंत्यदर्शनासाठी ठेवण्यात येणार आहे. संध्याकाळी त्यांच्यावर अंत्यसंस्कार करण्यात येणार आहेत.