सचिन कदम

Eknath Shinde News : शिवसेना पक्षप्रमुख, माजी मुख्यमंत्री उद्धव ठाकरे यांनी पत्रकार परिषद घेऊन मुख्यमंत्र्यांवर निशाणा साधला. 'सुप्रीम कोर्टाने आधी 16 आमदारांच्या अपात्रतेचा मुद्दा निकाली काढावा, त्यानंतर निवडणूक आयोगाने आपला निर्णय द्यावा, असं आवाहन उद्धव ठाकरे यांनी यावेळी केल. मुख्यमंत्र्यांनी उद्धव ठाकरे यांच्या या आवाहनानंतर त्यांच्यावर त्यांचे नाव न घेता टीका केली आहे. (Latest Marathi News)

मुख्यमंत्री एकनाथ शिंदे (Eknath Shinde) हे सध्या रायगडच्या दौऱ्यावर आहेत. या दौऱ्यादरम्यान मुख्यमंत्र्यांनी प्रसारमाध्यमांशी संवाद साधला. त्यावेळी मुख्यमंत्र्यांनी उद्धव ठाकरे यांच्यावर निशाणा साधला.

मुख्यमंत्री एकनाथ शिंदे म्हणले, 'आम्ही न्यायप्रिय लोक आहोत. सर्वोच्च न्यायालयाचा निर्णय आमच्यासाठी अंतिण असेल. काही लोक सुप्रीम कोर्टाला मार्गदर्शन करायला आणि सल्ले द्यायला लागले तर मी त्यावर काय बोलू शकतो? असा सवाल करत उद्धव ठाकरे (Uddhav Thackeray) यांचे नाव न घेता एकनाथ शिंदे यांनी टीका केली आहे.

उद्धव ठाकरे न्यायाधीश आहेत का? बावनकुळेंचा सवाल

दरम्यान,भाजप प्रदेशाध्यक्ष चंद्रशेखर बावनकुळे यांनी देखील उद्धव ठाकरेंवर निशाणा साधला आहे. 'एकीकडे उद्धव ठाकरे म्हणतात, १६ आमदार अपात्र होणार असं म्हणतात, हे न्यायाधीश आहे का? सध्या ते न्यायालयात प्रकरण आहे, असं म्हणत चंद्रशेखर बावनकुळे यांनी उद्धव ठाकरे यांच्यावर निशाणा साधला.

काय म्हणाले होते उद्धव ठाकरे?

'जनतेच्या मनात संभ्रम आहे. शिवसेनेचं काय होणार असा प्रश्न अनेकांना पडला आहे. शिवसेनेचे दोन गट मी मान्य करत नाही. शिवसेना एकच आहे आणि एकच राहणार आहे. शिवसेना आमचीच आहे. दुसऱ्या गटाला मी शिवसेना मानत नाही, असं उद्धव ठाकरेंनी म्हटलं होतं.

'सुप्रीम कोर्टाच्या निकालात 16 आमदार अपात्र होण्याची दाट शक्यता आहे. घटनातज्ञ आणि घटनेत नमूद केल्याप्रमाणे त्याचा निकाल आधी लागावा अशी आमची अपेक्षा आहे. निवडणूक आयोगाने काय करावं हे सांगण्याचा आमचा हेतू नाही, असंही उद्धव ठाकरे म्हणाले होते.