एक मोठी राजकीय बातमी समोर येत आहे. लोकसभा निवडणुकीच्या निकालानंतर म्हणजेच 4 जून नंतर महाराष्ट्राच्या मंत्रिमंडळात मोठे बदल होऊ शकतात, अशी माहिती सूत्रांनी दिली आहे.

सूत्रांनी सांगितलं की, लोकसभा निवडणुकीतील परफॉर्मन्स पाहता काही मंत्र्यांची खाती बदलण्याची दाट शक्यता. अनेक मंत्र्यांकडे असलेल्या दोन ते तीन खाती यांच वाटप मंत्रिमंडळ विस्तारा दरम्यान होण्याची शक्यता आहे. यातच खात्यांशिवाय महामंडळात संदर्भात देखील वाटप होण्याची शक्यता वर्तवली जात आहे. मंत्रिमंडळाच्या एकूणच या बदलासाठी मुख्यमंत्री एकनाथ शिंदे आणि दोन्ही उपमुख्यमंत्र्यांची गुप्त बैठक झाल्याची माहिती, सूत्रांनी दिली आहे.

सूत्रांनी दिलेल्या माहितीनुसार, लोकसभा निवडणुकीचे निकाल 4 जूनला जाहीर होणार आहे. यावरच राज्यातील अनेक मंत्र्यांचे भवितव्यही अवलंबून आहे. कारण एकीकडे केंद्रात मोठे बदल होताना दिसणार आहे. तर राज्यातही ज्या मंत्र्यांनी लोकसभेत परफॉर्मन्स दिला आहे, ज्या पद्धतीने काम केलं आहे, सगळ्या गोष्टी लक्षात घेऊन त्या मंत्र्यांचे खाते बदलले जाणार आहे.

तसेच काही मंत्र्यांकडे अतिरिक्त जबाबदारी दिली जाणार आहे. तर काही मंत्र्यांकडे आधीच दोन ते तीन खाती असल्याने त्यांची जबाबदारी इतर मंत्र्यांना दिली जाऊ शकते किंवा नवीन चेहऱ्यांना संधी दिली जाऊ शकते, अशी माहितीही सूत्रांनी दिली.

यातच मुख्यमंत्री एकनाथ शिंदे , उपमुख्यमंत्री देवेंद्र फडणवीस आणि उपमुख्यमंत्री अजित पवार यांची एक गुप्त बैठक झाली असल्याची माहिती सूत्रांनी दिली आहे. याच बैठकीत मंत्रिमंडळ विस्तार आणि काही मंत्र्यांची खाते बदल करण्याबाबत चर्चा झाली असल्याची माहिती सूत्रांनी दिली.