लातूर जिल्ह्यात मागील दोन ते तीन दिवसांपासून मुसळधार पावसामुळे जनजीवन विस्कळीत झाले आहे. मुरुड (ता. लातूर) येथे मंगळवारी ढगफुटी सदृश पाऊस झाल्याने काढणीला आलेले सोयाबीन पीक पावसात भिजल्याने शेतकऱ्यांवर संकट आलं आहे. तसेच अनेकांच्या घरांचे, दुकानांचे मोठ्याप्रमाणात नुकसान झाले आहे, त्यामुळे नुकसानीचे तातडीने पंचनामे करुन नागरिकांना मदत करावी, अशी मागणी लातूर ग्रामीणचे आमदार धिरज विलासराव देशमुख यांनी केली आहे. त्यांनी पत्राद्वारे जिल्हा प्रशासनाकडे ही मागणी केली आहे.

आमदार धिरज देशमुख यांनी मुरुड इथे जाऊन नुकसान झालेल्या भागाची पाहणी केली. यावेळी त्यांनी प्रशासनाकडे त्वरित नुकसान भरपाई मिळवून देण्यासाठी प्रयत्न करणार असल्याचं आश्वसन शेतकरी आणि स्थानिक नागरिकांना दिलं.

दरम्यान, मंगळवारी रात्री साडेनऊच्या सुमारास मुरुड येथे ढगफुटी सदृश्य पाऊस झाल्याने अचानक पूराची स्थिती निर्माण झाल्याने पूराचे पाणी नागरिकांच्या घरात, बाजारपेठेतील दुकानांमध्ये गेल्याने संसारोपयोगी साहित्य तसेच दुकानांमधील साहित्याचे मोठे नुकसान झाले. यानंतर आमदार धिरज देशमुख यांनी शेतकऱ्यांच्या बांधावर पोहोचवून नुकसानीची पाहणी केली.

देशमुख यांनी याबाबत जिल्हाधिकाऱ्यांना पत्र लिहून त्वरित पंचनामे करण्याची मागणी केली. पावसामुळे काढणीस आलेल्या सोयाबीन पिकाचे देखील मोठे नुकसान झाल्याने शेतकरी संकटात सापडला आहे. त्यामुळे प्रशासनाने महसूल आणि विमा कंपन्यांना सूचित करुन आपत्तीग्रस्त शेतकऱ्यांना तात्काळ दिलासा द्यावा, असे त्यांनी पत्रात म्हटले आहे.

अतिवृष्टीमुळे शेतकरी कोलमडला आहे. त्यात पुन्हा शासनाने दप्तर दिरंगाई केल्यास त्यांचे अधिक नुकसान होईल. त्यामुळे महसूल प्रशासन आणि विमा कंपन्यांनी अडवणूक न करता त्वरित पंचनामे करावेत, असेही आमदार धिरज देशमुख यांनी म्हटले आहे.