Malkapur Breaking News : राज्य परिवहन महामंडळाच्या मलकापूर आगार प्रमुखांवर आज जमावानं जीवघेणा हल्ला केला. यामधून आगार प्रमुख थोडक्यात बचावले आहेत. एका बसमुळं दाेन युवकांचा (youth) हात कापल्यानं जमावानं बस (msrtc bus) स्थानकात राडा घातला. या जमावाकडून बस स्थानकातील कक्षाची तोडफोड करण्यात आली आहे.

बुलढाणा जिल्ह्यातील मलकापूर - पिंपळगाव देवी मार्गावर सकाळी युवक रस्त्याच्या कडेला पोलीस भरतीसाठी व्यायाम करीत असतात. याच मार्गावरून मलकापूर आगाराची बस निघाली हाेती. या बसच्या चालकाच्या मागील बाजूचा पत्रा तुटून बाहेर आलेला होता. त्यामुळे व्यायाम करणाऱ्या तरुणांना या पत्र्याचा धक्का लागून दोन तरुणांचे हात कापले गेले. या घटनेची माहिती गावात समजली. त्यामुळं भंगार बस रस्त्यावर का आणली गेली याचा जाब विचारण्यासाठी जमाव मलकापूर आगारात गेला. तेथे जमावानं आगार प्रमुखावर जीवघेणा हल्ला केला.

काहींनी आगार प्रमुखाच्या कक्षात जाऊन तोडफोड केली. यामुळं आगार प्रमुख दराडे हे भयभीत झाले. त्यांनी तेथून पळ काढला. तसेच ते डेपोमधील एका जागेत जाऊन लपले. या घटनेची माहिती मिळताच पोलिसांनी (police) बस स्थानकात धाव घेतली. या घटनेने मलकापूर बस स्थानकात एकच गोंधळ उडाला. सध्या घटनास्थळी पाेलीस फाैजफाटा आहे.

Edited By : Siddharth Latkar