CM Eknath Shinde Delhi Visit : राज्याचे मुख्यमंत्री एकनाथ शिंदे आज (२६ फेब्रुवारी) दिल्ली दौऱ्यावर जाणार आहेत. आज सायंकाळी ६.३० च्या सुमार मुख्यमंत्री दिल्लीसाठी रवाना होणार आहे. मुख्यमंत्री शिंदे यांच्या दिल्ली दौऱ्यामागचं कारण अद्याप गुलदस्त्यात आहे. अर्थसंकल्पीय अधिवेशनापूर्वी मुख्यमंत्र्यांचा हा दिल्ली दौरा महत्वाचा आणि मंत्रीमंडळ विस्ताराच्या अनुशंगाने महत्वाचा असल्याचे बोलले जात आहे.

आज राज्यमंत्रीमंडळाच्या बैठकिनंतर मुख्यमंत्री शिंदे (Eknath Shinde) पत्रकार परिषद घेणार आहेत आणि त्यानंतर मुख्यमंत्री हे दिल्लीसाठी (Delhi) रवाना होणार आहेत. या दिल्ली दौऱ्यात मुख्यमंत्री मंत्रीमंडळाच्या विस्ताराबाबत भाजपच्या प्रमुख नेत्यांसोबत चर्चा करणारं असल्याची माहिती सूत्रांकडून देण्यात आली आहे.

पक्षाचे 'चिन्ह' आणि 'नाव' मिळाल्यानंतर मंत्रीमंडळ विस्ताराचा मार्ग मोकळा झाल्याने अधिवेशना दरम्यान किंवा त्यानंतर मंत्रीमंडळ विस्तार होण्याची शक्यता वर्तवली जात आहे. दिल्लीत मुख्यमंत्री केंद्रीय गृहमंत्री अमित शहा यांची देखील भेट घेणार असल्याची माहिती समोर आली आहे. अवघ्या काही तासांसाठी मुख्यमंत्री दिल्ली दौरा करणार असल्याने चर्चांना उधाण आलं आहे.