हा राडा झालाय सोलापूरच्या माढा तालुक्यातील अंजनगावमध्ये. छत्रपती शिवाजी महाराजांच्या पुण्यतिथीच्या तोंडावर माढा तालुक्यात जातीय सलोखा बिघडलाय. दोन समाज आमने-सामने आलेत. खरं तर अंजनगावात मराठा समाजानं परवानगी न घेता छत्रपती शिवाजी महाराजांचा आश्वारुढ पुतळा उभा केला.आणि हाच मुद्दा आता वादाचं कारण ठरलाय.

कारण एक समाजानं ही जागा खेळोबा या देवस्थानची असल्यानं पुतळा स्थलांतरीत करण्याची मागणी करत आंदोलन छेडलं. तर दुसऱ्या गटानंही ही जागा शासकीय असल्यानं पुतळा उभारणारच अशी भूमिका घेतली. त्यामुळे अंजनगावात तणाव वाढलाय.

मात्र जमिनीचा नेमका वाद काय आहे? पाहूयात.

अंजनगावच्या चौकात ज्या ठिकाणी पुतळा बसवण्यात आला ती जागा खेळोबा देवस्थान ट्रस्टची असल्याचा एका गटाचा दावा आहे. तर खेळोबा हे धनगर समाजाचं देवस्थान असून या जागेशेजारच्या ग्रामपंचायतच्या जागेवर पुतळा उभारण्याची मागणी धनगर समाजानं केलीय.तर ज्या जागेवर पुतळा उभा केला आहे, ही जागा सरकारची असल्याचा दावा मराठा समाजानं केलाय.

खरं तर राज्यात अनेक ठिकाणी सरकारची परवानगी न घेताच पुतळे उभा करण्याचा नवा ट्रेंड सुरु झालाय. त्यात मूळ वाद जमिनीच्या मालकीचा असतानाही यात महाराजांच्या पुतळ्यावरुन जातीय राजकारण उचल खातंय. त्यामुळेच जर वाद जमिनीचा आहे तर त्यात महाराजांच्या पुतळ्यावरुन जातीय राजकारण का केलं जातयं. त्यामुळे मुळ वादावर तोडगा काढावा, त्याला जातीय रंग नको .असं आवाहन साम टीव्ही करत आहे.