शेतकरी आणि बैलाचं नातं केवळ मालक आणि प्राणी असं नसतं, तर बैल हा शेतकऱ्याच्या कुटुंबातला सदस्यच असतो आणि याचीच अनुभूती आलीय ती छत्रपती संभाजीनगरच्या पाचोडमध्ये. एका खंड्या बैलाच्या मृत्यूनंतर शेतकऱ्यानं चक्क त्याचे सर्व विधी केलेत. खंड्याचं केवळ दहावं, तेरावं करुन शेतकरी थांबला नाही तर त्यानं बैलावरच्या प्रेमापोटी मुंडणही केल्याचं पाहायला मिळालं.

तेरा दिवसापुर्वी खंड्याचा आजारपणानं मृत्यू झालाआणि पाचोडच्या मोहन बापूराव झिने यांच्या कुटुंबावर दुःखाचा डोंगर कोसळला. कारण तब्बल २८ वर्षांपूर्वी खंड्या लहान होता. तेव्हा झिने कुटुंबाची आर्थिक परिस्थिती प्रचंड हालाखीची होती. त्यामुळे त्यांना ऊसतोडीसाठी जावं लागायचं.

पैसे नसल्यानं मोठा बैल घेणं शक्य नव्हतं. त्यावेळी लहानग्या खंड्यालाच झिनेंनी गाडीला जुंपलं आणि खंड्यानंही झिनेंना हलाकीच्या परिस्थितीतून बाहेर काढण्याची जबाबदारी स्वतःच्या खांद्यावर घेतली. त्यामुळेच त्याच्या मृत्यूनंतर झिने कुटुंबातील सदस्यांना हुंदका आवरता आला नाही.

नातं हे केवळ कुटुंबातल्या लोकांसोबतच नसतं तर सुख दुखात साथ देणाऱ्या प्राण्यांसोबतही ते तेवढंच ताकदीचं असतं .हेच झिने कुटुंबीय आणि त्यांच्या बैलानं दाखवून दिलंय. त्यामुळे खंड्या या जगात नसला तरी झिने कुटुंबाच्या स्मृतीत तो कायम राहणार यात शंका नाही.