छत्रपती संभाजीनगरच्या कन्नड विधानसभा मतदारसंघात शिवसेना शिंदे गटाच्या उमेदवार संजना जाधव यांना भाषणावेळी अश्रू अनावर झाले. कन्नड विधानसभा मतदारसंघांमध्ये सध्या हर्षवर्धन जाधव - संजना जाधव अशी लढत आहे. या मतदारसंघामध्ये पती-पत्नीच निवडणुकीच्या रिंगणामध्ये आमने-सामने आले आहेत.

कन्नडमधील एका गावात भाषणादरम्यान संजना जाधव यांनी पती हर्षवर्धन जाधव यांच्याकडून काय काय सोसले हे सांगितले. त्यावेळी त्यांना रडू कोसळले. संजना जाधव या भाजप नेते रावसाहेब दानवे यांची मुलगी आहे. हर्षवर्धन जाधव यांच्यासोबत लग्न केल्यानंतर त्यांना प्रचंड त्रास सहन करावा लागला.

लग्नानंतर पहिल्याच महिन्यात त्या माहेरी आल्या. नवऱ्याकडून होणाऱ्या त्रासाला त्या कंटाळल्या होत्या. पण वडील रावसाहेब दानवे यांनी त्यांना सल्ला दिला आणि त्या पुन्हा सासरी गेल्या. अजूनही संजना जाधव आणि रावसाहेब दानवे हे हर्षवर्धन जाधव यांचा त्रास सहन करत आहेत. हे सर्व भरसभेत सांगत असताना संजना जाधव यांच्या डोळ्यामध्ये पाणी आले आणि त्या रडू लागल्या. त्यामुळे थोडा वेळ भाषण थांबवून त्या पाणी प्यायल्या आणि नंतर पुन्हा भाषण सुरू केले.

संजय जाधव यांनी भरसभेत सांगितले की, 'माझ्या वडिलांवर वाटेल ते आरोप झाले. पण आम्ही ते सहन केले. कारण एका लेकीच्या बापाने ते सहन करायचे असतात म्हणून आम्ही सहन केले. एका मुलाचा बाप असता तर तो रस्त्यावर उतरला असता. पण एका मुलीचा बाप आहे म्हणून ते शांत बसले.' हे सांगताना संजना जाधव यांना अश्रू अनावर झाले.