Chhatrapati Sambhajinagar Crime: धनलाभासाठी जन्मदात्या आईनेच पोटच्या मुलीला पेट्रोल टाकून जाळण्याचा प्रयत्न केल्याचा धक्कादायक प्रकार समोर आला आहे. छत्रपती संभाजीनगरमध्ये घडलेल्या या घटनेने परिसरात एकच खळबळ उडाली आहे. (Crime News In Marathi)

याबाबत अधिक माहिती अशी की, धनलाभासाठी आईनेच मुलीला पेट्रोल टाकून जाळण्याचा प्रयत्न केल्याने संभाजीनगर शहर हादरुन गेले आहे. गुरूवार (१७ ऑगस्ट) रोजी हा प्रकार घडला असून याप्रकरणी मुलीने आई आणि तांत्रिक महिलेविरोधात तक्रार दाखल केली आहे.

या प्रकरणात मुलीने दिलेला सविस्तर वृत्तांतानुसार, घटनेच्या दिवशी पहाटे मला पेट्रोलचा वास आल्याने जाग आली. यावेळी मला माझीच गोधडी पेटल्याचे दिसले. यावेळी मी जीव वाचवण्यासाठी पळाले, मात्र आई तिथेच असताना मला कसलीही मदत केली नसल्याचे तिने सांगितले. तसेच भाऊ प्रसादने त्याच्याकडे असलेल्या गोधडीने माझ्या अंगाला लागलेली आग विझविल्याचेही तिने सांगितले.

मुलीच्या तक्रारीनुसार तांत्रिक शकुंतला अहिरे आणि आई पार्वती हुलमुख यांच्याविरोधात खुनाच्या प्रयत्नाचा गुन्हा दाखल करण्यात आला आहे. या प्रकरणी अद्याप कुणालाही अटक करण्यात आली नाही तसेच जादूटोणाविरोधी कायद्याची कलमेही लावण्यात आली नसल्याचे सांगण्यात येत आहे. (Latest Marathi News)