Chandra Grahan 2023 : आज (शनिवार) चंद्रग्रहण असल्याने शेगाव येथील संत गजानन महाराज समाधी मंदिरात दर्शनासाठी काही बदल करण्यात आल्याची माहिती मंदिर समितीने दिली आहे. आज दुपारी साडे तीन वाजल्यापासून ग्रहणाचे वेध सुरू होणार आहेत.(Maharashtra News)

शेगाव येथील संत गजानन महाराज समाधी मंदिर समितीच्या सूचना

१) मंदिर दर्शनासाठी खुले राहील मात्र भाविकांना जाळीतून दर्शन घ्यावे लागेल.

२) सूर्यास्ताची आरती होणार नाही .

३) मंदिर परिसरातील महाप्रसादाचे वाटप दुपारी ३:०० वाजेपासून बंद राहिल मात्र मंदिरा बाहेरील प्रसादालय व अल्पोहाराचे कक्ष सुरू राहतील.

प्रत्यक्ष चंद्रग्रहण रात्री १:०५ मिनिटांनी सुरू होणार असून रात्रीच २:३० वाजता ग्रहण सुटेल त्यामुळे रविवारी सकाळी पूर्ववत मंदिर भाविकांसाठी सुरू राहील.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

साता-यातील शनेश्वर मंदिर सायंकाळी राहणार बंद

दरम्यान सातारा शहरातील शनिवार पेठेतील शनि मारुती देवस्थान ट्रस्टने देखील मंदिराच्या वेळेतील बदल कळविले आहे. चंद्रग्रहण असल्याने वेदांचे नियम पाळायचे असल्याने श्री शनेश्वर महाराज यांची सायंकाळची महाआरती ठीक ७.०० वाजता होईल.

या मंदिरामध्ये सायंकाळी ७.०० वाजता नंतर पूजाआर्चा, पुजासाहित्य, प्रसाद , हार इत्यादी वस्तू अर्पण करू नये व ते स्विकारले ही जाणार नाहीत. महाआरती झाल्यानंतर साडे सात वाजता मंदीर पूर्णपणे बंद होईल असे कळविण्यात आले आहे.

Edited By : Siddharth Latkar