अमरावती : हिंदवी स्वराज्याचे संस्थापक छत्रपती शिवाजी महाराज यांचा 6 जून रोजी राज्याभिषेक करण्यात आला. संपूर्ण राज्यभर हा दिवस शिवराज्याभिषेक दिन म्हणून साजरा केला जातो. रयतेच्या आनंदाचा आणि अभिमानाचा सोहळा म्हणजे शिवराज्याभिषेक दिन. याच दिनाचे औचित्य साधून अमरावती येथील साबनपुरा जामा मशिदीत रक्तदान करून शिवराज्याभिषेक दिन साजरा करण्यात आला, हिंदू-मुस्लिम ऐक्याचा हा अनोखा क्षण अनुभवण्याची संधी अमरावतीकरांना मिळाली. (Amravati Latest News)

अलीकडच्या काळात अमरावतीत हिंदू-मुस्लिम दंगे झालेत. मात्र, शिवराज्याभिषेक दिनाचे औचित्य साधून येथील हिंदू-मुस्लिम बांधवांनी एकत्र येत सामाजिक सलोखा जपला. मंदिर, मस्जिद, गुरुद्वार तर कधी बौद्ध लेण्यांवरून समाजात विखार पसरवण्याचे काम काही कट्टरपंथीय धार्मिक लोक करत असतात. याच वातावरणात एकतेचा आणि समानतेचा संदेश देण्यासाठी अमरावतीत मस्जिदमध्ये शिवराज्याभिषेक दिन साजरा करण्यात आला.

दरम्यान, या कार्यक्रमात छत्रपती शिवाजी महाराजांच्या विचारांचे प्रबोधन झाले. यावेळी कार्यक्रमात माजी पालकमंत्री सुनील देशमुख, शिवसेना जिल्हाप्रमुख सुनील खराटे,काँग्रेसनेते माजी महापौर विलास इंगोले उपस्थित होते.

Edited By - Satish Daud