बुलढाणा : शेतकरी नेते रविकांत तुपकर हे मातोश्रीवर गेले होते. त्यावेळी त्यांना बुलढाणा विधानसभा मतदारसंघातून उमेदवारी ही मिळत होती. एबी फॉर्म देखील तयार होता. मात्र रात्रीतून बुलढाण्यातील काही लोक मातोश्रीवर दहा खोके घेऊन गेले आणि दुसऱ्या दिवशी सकाळी रविकांत तुपकर यांचा पत्ता कट झाला;  असा गंभीर आरोप बुलढाणा विधानसभा मतदारसंघाचे शिवसेनेचे उमेदवार संजय गायकवाड यांनी प्रचार सभेदरम्यान केला आहे.

बुलढाण्यात बोलताना संजय गायकवाड (Sanjay Gaikwad) यांनी रविकांत तुपकर यांच्यावर निशाणा साधला आहे. तर संजय गायकवाड यांनी मातोश्रीवर दहा खोके पोहोचल्यामुळे रविकांत तुपकर यांचा पत्ता कट झाला व जयश्री शेळके यांच्या पतीने पाचशे कोटी रुपये नोटबंदीच्या काळात घोटाळा करून कमवले; असा आरोप केल्यामुळे (Buldhana) जिल्ह्यात खळबळ उडाली आहे.

महाविकास आघाडीच्या बुलढाण्याच्या उमेदवार असलेल्या जयश्री शेळके यांचे पती सुनील शेळके यांच्यावर देखील गंभीर आरोप केले. त्यांनी म्हटलं की, नोटबंदीच्या काळात मुंबईच्या लोकांनी जयश्री शेळके यांच्या राजर्षी शाहू बँकेत नोटा बदलविण्यासाठी एक हजार कोटी रुपये जमा केले होते. मात्र यांनी ५०० कोटीच्या वर पाठवले. त्यावेळेस सुनील शेळके हे उपजिल्हाधिकारी पदावर कार्यरत होते. त्यांनी त्यानंतर नोकरी सोडून दिली. आज-काल मुलांना नोकरी मिळत नाही. मात्र उपजिल्हाधिकारी पदावरचा माणूस नोकरी सोडूच कशी शकतो? असा सवालही त्यांनी उपस्थित केला.