बुलढाणा : कृषीप्रधान देशात पोळा या सणाचे शेतकऱ्यांना वेगळेच महत्त्व आहे. वर्षभर शेतात राबत असलेल्या बैलांप्रती कृतज्ञता व्यक्त करण्यासाठी बळीराजा पोळा सण मोठ्या उत्साहात साजरा करत असतो. मात्र बुलढाणा जिल्ह्यात पोळा सण साजरा करण्यावर निर्बंध घालण्यात आले आहेत. लंपीचा प्रादुर्भाव वाढला असल्याने जिल्हाधिकारी यांनी याबाबतचे आदेश काढले आहेत. 

बुलढाणा जिल्ह्यात अनेक तालुक्यात जनावरांमध्ये लंपीचा प्रादुर्भाव मोठ्या प्रमाणात दिसत आहे. यामुळे जिल्हाधिकाऱ्यांनी एक आदेश काढून पोळा सण हा सार्वजनिक ठिकाणी साजरा न करण्याचे आदेश पारित केले आहे. अर्थात वर्षातून एक दिवस बैलांप्रती कृतज्ञता व्यक्त करण्यासाठी सण साजरा करण्याची शेतकऱ्यांची तयारी झाली आहे. यामुळे जिल्हाधिकाऱ्यांनी काढलेल्या आदेशावर शेतकऱ्यांमध्ये नाराजी आहे. 

गुरांच्या बाजारावरून शेतकऱ्यांनी घेतला आक्षेप 

दरम्यान आज गुरुवार असल्याने खामगाव येथील गुरांच्या बाजारात मोठ्या प्रमाणात गुरे एकत्र आलेले आहेत. हे अधोरेखित करत शेतकऱ्यांनी जिल्हाधिकाऱ्यांच्या आदेशावर आक्षेप घेतला आहे. यावर बोट ठेवत आम्ही पोळा साजरा करणारच! जिल्हाधिकाऱ्यांना गुरांच्या बाजारातील गुरे दिसत नाहीत का? फक्त हिंदूंच्या सणांना अडथळा का? असे सवाल करत शेतकऱ्यांनी जिल्हाधिकाऱ्यांच्या पोळा सार्वजनिक साजरा न करण्याच्या आदेशावर आक्षेप घेतला आहे. 

सण साजरा करण्यावर शेतकरी ठाम 

पोळा सण उद्याच्या दिवशी साजरा केला जात असल्याने शेतकऱ्यांची त्या अनुषंगाने तयारी झाली आहे. अर्थात गावात बैलांची मिरवणूक काढत हा सण साजरा केला जातो. यामुळे आजच्या आदेशावर अनेक शेतकरी आक्रमक होत आम्ही पोळा साजरा करणारच अशा भूमिकेवर ठाम आहेत. यामुळे आता यावर बुलढाणा जिल्हाधिकारी काय भूमिका घेतात हे बघणं महत्त्वाचं आहे.