संजय जाधव, बुलढाणा प्रतिनिधी

Maharashtra highway crash, car truck collision : बुलढाण्यामध्ये ट्रक आणि कारचा भीषण अपघात झालाय. महामार्ग क्रमांक ६ वर नांदुरा जवळ आर्टिका कार आणि ट्रकची जोरदार धडक झाली. या अपघातामध्ये तीन जणांचा जागेवरच मृत्यू झाला. तर चार जण गंभीर जखमी झाले आहेत. अपघात इतका भयंकर होता की महामार्गावर बचाव कार्य दोन तास सुरू होते. पोलिसांनी घटनास्थळावर तात्काळ धाव घेत वाहतूक सुरळीत केली. अपघातामधील जखमींना जवळच्या रूग्णालयात दाखल केले.

राष्ट्रीय महामार्ग क्रमांक ६ वर नांदुरा शहराजवळ आज सकाळी कार आणि ट्रक यांच्यात झालेल्या भीषण अपघातात तीन जणांचा जागीच मृत्यू झाला, तर चार जण गंभीर जखमी झाले. अपघात इतका भीषण होता की, आर्टिका कार पूर्णपणे चक्काचूर झाली. जखमी आणि मृतांना कारमधून बाहेर काढण्यासाठी बचाव पथकाला दोन तासांहून अधिक काळ प्रयत्न करावे लागले.

प्रत्यक्षदर्शींनुसार, ट्रक आणि कार यांच्यात समोरासमोर जोरात धडक झाली. अपघाताचे नेमके कारण अद्याप समजू शकले नाही. जखमींना तातडीने खामगाव येथील शासकीय रुग्णालयात दाखल करण्यात आले. त्यांच्यावर उपचार सुरू आहेत. यापैकी तिघांची प्रकृती चिंताजनक असल्याची माहिती रुग्णालय प्रशासनाने दिली.

पोलिसांनी घटनास्थळी धाव घेऊन तपास सुरू केला आहे. अपघातामुळे महामार्गावरील वाहतूक काही काळ ठप्प झाली होती. मृत आणि जखमींची ओळख पटवण्याचे काम सुरू आहे. या घटनेमुळे परिसरात हळहळ व्यक्त होत आहे. या भीषण अपघातामुळे महामार्गावरील वाहतूक सुरक्षिततेचा प्रश्न पुन्हा ऐरणीवर आला आहे.