khamgaon dalit youth naked beaten : बुलढाणा जिल्ह्यातील खामगाव येथील संतापजनक प्रकार समोर आला आहे. येथील दलित तरुणाला गाय चोरल्याच्या संशयावरून विवस्त्र करत बेदम मारहाण करण्यात आली. तरूणाला मारहाण झाल्याची घटना समोर आल्यानंतर ऑल इंडिया पँथर सेनेचे कार्यकर्ते आक्रमक झालेत. आरोपींवर मकोका लावा, कठोर कार्यवाही करावी. त्यांचे घरावर बुलडोझर चालवा अन्यथा राज्यात परिणाम वाईट होतील, असा इशारा दिला. जनावरांच्या नावावर माणसांना मारणाऱ्या प्रवृत्तीला आता ठेचल्याशिवाय शांत बसणार नाही, असा इशारा त्यांनी सरकारला दिला आहे. दरम्यान,  खामगाव शहरातील या घटनेमुळे बुलढाणा जिल्ह्यात खळबळ उडाली असून सर्वत्र संताप व्यक्त करण्यात येत आहे.

खामगावमध्ये मध्यरात्री नेमकं काय झालं ?

खामगाव शहरातील बस स्थानक परिसरातून रात्री एका २४ वर्षीय दलित तरुणाचं अपहरण करण्यात आले. त्याला जवळच असलेल्या मैदानात नेलं आणि जबर मारहाण केली. इतकंच नाही तर या तरुणाला विवस्त्र केलं आणि गायींसोबत व्हिडिओ आणि फोटो काढण्यात आले. त्यानंतर पुन्हा त्या तरुणाला दुसऱ्या ठिकाणी नेलं आणि विवस्त्र करत मारहाण करण्यात आली. नशिबाने गस्तीवर असलेल्या पोलीस व्हॅनचा सायरन वाजल्याने त्या तरुणाचा जीव वाचला. ही धक्कादायक घटना तीन पोलीस स्टेशन, उपविभागीय पोलिस अधिकारी व अप्पर पोलीस अधीक्षक असलेल्या खामगाव शहरात घडली आहे. या मारहाणीत या दलीत तरुणाचा एक डोळा निकामी झाला असून नाकाचं हाड मोडलं आहे. सध्या या तरूणावर शासकीय रुग्णालयात उपचार सुरू आहेत.

पोलिसात गुन्हा दाखल -

या प्रकरणी शिवाजीनगर पोलिसांनी तीन तरुणांविरुद्ध गुन्हा दाखल केला आहे. पोलिसांनी तात्काळ दोन तरुणांना अटक केली आहे. मात्र तिसरा अद्यापही फरार आहे. याप्रकरणी आता दलित संघटना आक्रमक झाल्या आहेत ऑल इंडिया पॅंथर सेनेचे राष्ट्रीय अध्यक्ष दीपक केदार खामगाव येथे येऊन त्या तरुणाची भेट घेणार आहेत.