बुलढाणा : जुन्या वैमनस्यातून गुन्हेगारी पार्श्वभूमी असलेल्या इसमावर धारदार शस्त्राने वार करत हत्या करण्यात आल्याची घटना बुलढाण्याच्या सैलानी येथे घडली आहे. रात्रीच्या सुमारास घडलेल्या या घटनेने खळबळ उडाली असून या प्रकरणात तपास करत रायपूर पोलिसांकडून तिघांना अटक केली आहे. या प्रकरणी पुढील तपास सुरु आहे. 

बुलढाणा तालुक्यातील सैलानी येथे काल मध्यरात्रीच्या सुमारास हत्या करण्यात आली आहे. जुन्या वैमनस्यातून बुलढाणा येथील गुन्हेगारी पार्श्वभूमी असलेल्या बाब्या उर्फ शेख नफिज शेख हफिज याचा धारदार शस्त्राने वार केले. तसेच लाकडी दांड्याने बेदम मारहाण करून त्याचा खून केल्याची घटना घडली आहे. या घटनेने खळबळ उडाली आहे. 

रस्त्यावर गाठत चढविला हल्ला 

सैलानी येथील बरीबाबा दर्गा असलेल्या रस्त्यावर हल्लेखोरांनी बाब्यावर प्राणघातक हल्ला चढवला. अलेक्स इनोक जोसेफ ऊर्फ रोनी, शेख सलमान शेख अशपाक आणि सैयद वाजीद सैय्यद राजू ऊर्फ वाजीद टोपी (सर्व राहणार सैलानी) या तिघांनी मिळून धारदार शस्त्र तसेच लाकडी दांड्याने बाब्यावर हल्ला केला. दरम्यान गंभीर जखमी झालेल्या बाबू हा रक्ताच्या थारोळ्यात पडला होता. यानंतर त्याचा घटनास्थळीच मृत्यू झाला. 

रात्रीत आरोपी ताब्यात 

दरम्यान घटनेची माहिती मिळताच रायपूर पोलिसांनी तातडीने घटनास्थळी धाव घेतली. मात्र आरोपी घटनास्थळावरून फरार झाले होते. पोलिसांनी तात्काळ पथक तयार आरोपींचे मागे लावले. तांत्रिक बाबींचा वापर करून आरोपींना जाफराबाद येथून अटक केली. त्यांच्यावर खुनाचा गुन्हा दाखल करण्यात आला असून पोलिसांनी ताब्यात घेतलेल्या आरोपींनी खुनाची कबुली दिली. मात्र या घटनेने सैलानी परिसरात एकच खळबळ उडाली.